Nagavci thotë se Ligji i ri për Rregullat në Trafik do të ketë dënime shumë më të ashpra

Pas aksidentit tragjik në autostradën “Ibrahim Rugova” në Prizren, ku tre të rinj humbën jetën, ka reaguar edhe ministrja e Arsimit, Arbërie Nagavci.

Nagavci theksoi nevojën për ndëshkime më të ashpra në legjislacionin e trafikut rrugor.

Në llogarinë e saj në Facebook, ajo bëri të ditur se po përgatisin një projektligj të ri, i cili synon të rrisë ndjeshëm dënimet për shkelësit e rregullave të trafikut, në përpjekje për të parandaluar incidente të mëtejshme dhe për të rritur sigurinë rrugore.

Ministrja shprehu ngushëllimet e saj më të thella për familjet e viktimave të ndjera, Lordi Syla, Molos Delija dhe Nue Bibaj, duke theksuar se sjellja e papërgjegjshme dhe mosrespektimi i rregullave të trafikut janë të papranueshme dhe kanë pasoja që nuk mund të zhbëhen.

Ajo shtoi se rritja e ndërgjegjësimit dhe zbatimi rigoroz i ligjit janë hapat kyç për të mbrojtur jetët e qytetarëve në rrugët e Kosovës.

Sipas Policisë, brenda 24 orëve në Kosovë kanë ndodhur 56 aksidente trafiku./Telegrafi/