Ilir Shaqiri dhe Çun Lajçi reagojnë për vdekjen e artistit Mirush Kabashi

Ka vdekur në moshën 75 vjeçare aktori i njohur shqiptar, Mirush Kabashi.

Ai ka qenë njëri nga artistët më të dalluar me mbi 100 role në filma e teatër, duke lënë pas kështu një krijimtari të bujshme artistike.

Vdekja e tij ka lënë të pikëlluar të gjithë, posaçërisht ata që e njohën nga afër.

Për vdekjen e Kabashit kanë reaguar dy artistë të mirënjohur, Ilir Shaqiri dhe Çun Lajçi.

Më poshtë ua sjellim postimet e tyre:

Ilir Shaqiri

“Është këputur frymëmarrja e mushkërive të Sokratit, apologjia e vërtetë e tij; është ndarë nga jeta Mirush Kabashi “Nderi i Kombit”.
Artisti i mbi 100 roleve në teatër dhe film.

Aktori i burimeve metafizike nga Gjakova, që dridhi skenat evropiane në 109 koncerte “Homazh për Kosovën, 1998”, duke frymëzuar rininë shqiptare që të rreshtohet në formacionet e ushtrisë së lavdishme çlirimtare – UÇK, për lirinë e atdheut.

Qoftë kujtimi për ty ashtu siç arti yt – i përjetshëm!

Lamtumirë, MJESHTËR!”.

Çun Lajçi:

“Lamtumurë artist!

Tash e dy vite ta ndollën vdekjën këta t’gjallët e vdekun, dhe sot tu paska ba boll me ndjellje ligësishë, me art që s’ditën të ta konsumojnë, me jetën e rreme nga të rremit që ndjellin zi!

– Dil andej Mirush, se atje do t’vimë ne që të deshtëm e do ta përfeksionojmë ate grimcë arti që s’arritëm ta ngrehim kurrë n’majen e duhun!

Por …

Dije, se nga sot e tutje për ty do t’thonë; – ai, po ai ishte i madh, gjeni ishte, yll arti i pashuar!

– Lamtumirë kolegu im, që viteve 98-ta u munduem t’ia zbusim dhimbjën Kosovës – ti me Kosovarin e Mitrushit unë me Plisin e Çunit”. /Telegrafi/