Gjermania propozon një reformë të madhe të Bashkimit Evropian

Ministrja e Punëve të Jashtme të Gjermanisë, Annalena Baerbock njoftoi gjatë një konference për zgjerimin e Bashkimit Evropian në Berlin fillimin e procesit të forcimit të strukturave të brendshme të BE-së si përgatitje për procesin e zgjerimit dhe në të njëjtën kohë propozoi integrimin gradual të vendeve kandidate.

“Mendoj se mund të mendojmë për integrimin gradual të vendeve kandidate, të cilat, me mbylljen e kapitujve të rinj, do të mundësohet qasje në punën e Bashkimit Evropian, ndër të tjera, dhe duke marrë pjesë në mbledhjet e Këshillit të BE-së”, tha gjermania në hapjen e konferencës ministrore me titull “Bashkimi më i madh, më i fortë”.

Ministrja gjermane tha se qeveria e saj po shqyrton një sërë masash që do ta bëjnë BE-në më efektive në kohën e zgjerimit.

Këto masa përfshijnë gjithashtu kufizimin e fushave vendimmarrëse në të cilat do të ishte e mundur një veto. Baerbock përmendi mundësinë e futjes së një lloj votimi në Këshillin e BE-së përmes kartonëve të verdhë dhe të kuq: të verdhë në rast të pakënaqësisë me disa pjesë të vendimit, të kuq në rast mosmarrëveshjeje të plotë.

Baerbock gjithashtu parashtroi idenë e reduktimit të Parlamentit Evropian dhe Komisionit Evropian, ku disa departamente brenda komisionit do të ndaheshin midis disa shteteve anëtare.

“Bashkimi Evropian mund të jetë një akter më i fortë vetëm nëse pranojmë atë që kemi shtyrë për një kohë të gjatë, që është reforma e mënyrës së funksionimit të BE-së”, tha ajo.

Ajo tha se përpunimi i planeve të reformës do të vazhdojë gjatë presidencës belge të Bashkimit Evropian në gjysmën e parë të vitit 2024 dhe shprehu shpresën se do të përfundojë në periudhën e ardhshme zgjedhore.

Baerbock tha se procesi i zgjerimit është i nevojshëm për ta bërë BE-në një akter edhe më të fortë dhe për të rritur sigurinë. Në punimet e konferencës merr pjesë edhe ministri i Punëve të Jashtme të Ukrainës, Dmytro Kuleba.

Baerbock tha se zgjerimi i BE-së në vendet e Ballkanit Perëndimor, si dhe në Ukrainë dhe Moldavi, është i nevojshëm për shkak të situatës gjeostrategjike dhe politikës së presidentit rus, Vladimir Putin.

Konferenca ministrore ku diskutohet për forcimin e strukturave të Bashkimit Evropian me qëllim përgatitjen për vazhdimin e procesit të zgjerimit u organizua nga Gjermania në bashkëpunim me Spanjën, e cila aktualisht mban presidencën e BE-së. /Telegrafi/