Reagime nga politika e shoqëria civile lidhur me “ultimatumin” e liderëve evropianë

Deklarata e përbashkët e liderëve të shteteve kryesore të Bashkimit Evropian pas takimit në Bruksel me kryeministrin e Kosovës, Albin Kurti dhe presidentin e Serbisë, Aleksandar Vuçiq, ka ngjallur reagime të shumta.

Kancelari gjerman, Olaf Scholz, presidenti francez, Emmanuel Macron dhe kryeministrja italiane, Giorgia Meloni, kanë kërkuar që Kosova të nisë me procedurat për themelimin e Asociacionit të komunave me shumicë serbe, sipas draft-statutit të propozuar nga ndërkombëtarët më 21 tetor dhe që Serbia të jetësojë njohjen de-facto.

Për themelimin e Asociacionit BE-ja i ka propozuar një draft Kosovës më 21 tetor, për të cilin Kurti ka thënë se ka pranuar që ta nënshkruajë.

Lexo po ashtu Liderët evropianë me letër të përbashkët: Kosova ta bëjë Asociacionin, Serbia njohjen de-facto

E kjo ka ngjallur reagimin e opozitës dhe shoqërisë civile në Kosovë, të cilët e kanë fajësuar kreun e ekzekutivit kosovar se ia ka humbur Kosovës 10 vite me protesta të dhunshme kundër ‘zajednicës’.

Deputeti i Lidhjes Demokratike të Kosovës, Avdullah Hoti, ka thënë se partia në pushtet ka fituar vota në zgjedhjet e fundit “për të mos bërë kurrfarë zajednice, as asi, as ksi”.

“Nuk e bën ‘zajednicën’ kur aleatët u kërkonin ta bënin sipas marrëveshjeve të vitit 2013 dhe 2015, ku kjo e fundit e thotë qartë se asociacioni bëhet kur Gjykata Kushtetuese thotë se ‘statuti i asociacionit është në përputhje me Kushtetutën e Kosovës’. Tani, për të mbetur në pushtet, pranojnë propozimin për ‘zajednicën’ që u vihet në tavolinë me stilin merre ose lëre”, ka shkruar Hoti në Facebook.

Ndërsa Ehat Miftaraj nga Instituti i Kosovës për Drejtësi, duke komentuar deklaratën e tre liderëve evropianë ka thënë se “këtë fitore Kosova ka mundur ta kishte në xhep edhe në 2020, 2021 dhe 2022”.

“Kancelari gjerman Olaf Scholz, presidenti francez Emmanuel Macron dhe kryeministrja italiane Giorgia Meloni, kanë kërkuar që Kosova të nisë me procedurat për themelimin e Asociacionit të komunave me shumicë serbe, sipas draft-statutit të propozuar nga ndërkombëtarët më 21 tetor dhe që Serbia të jetësojë njohjen de-facto”.

“Këtë fitore Kosova ka mundur ta kishte ne xhep edhe ne 2020, 2021 dhe 2022. Katër vite të shkuara dëm për të arritur në të njëjtin destinacion. Së paku më s’ka dyshime se Albin Kurti dhe Besnik Bislimi e pranuan në mënyrë publike dhe pa akuivoke themelimin e Asociacionit. Dhe mirë që e pranuan një të vërtetë të cilën të gjithë e kanë ditur, por që s’kanë pasur guxim ta pranojnë”, ka shkruar Miftaraj në Facebook.

E analisti kosovar dhe themeluesi i KIPRED, Lulzim Peci, ka thënë se marrëveshja bazë për normalizimin e marrëdhënieve Kosovë-Serbi nuk bën të pranohet pa u nënshkruar.

“Serbia po dëshiron në esencë përmes mosnënshtrimit ta trajtojë këtë marrëveshje sikurse Pakon e Ahtisarit, pra të marr prej saj çfarë i konvenon dhe të tjerat të mos i zbaton”, ka shkruar Peci në Facebook.

Mirëpo sipas tij, as nënshkrimi i dy palëve nuk është i mjaftueshëm.

“Këtë së paku na tregon edhe përvoja e deritanishme e negociatave, pasi ato i kanë nënshkruar shumë marrëveshje të cilat nuk i kanë zbatuar, duke përfshirë këtu edhe asociacionin. Prandaj, ajo duhet të nënshkruhet edhe nga garantuesit e saj, në mënyrë qe ajo të zbatohet”, ka shtuar Peci.

Prandaj, ai ka thënë se BE-ja dhe SHBA-të duhet të marrin tani hapa vendimtarë për detyrimin e palëve për zbatimin e marrëveshjes, “përndryshe konfliktin e kemi në derë të shtëpisë”. /Telegrafi/