Avokati i 16 vjeçarit që u arrestua për terrorizëm: Kemi parashtruar ankesë, klienti im nuk kishte armë

Një 16 vjeçar nga Peja ka përfunduar në masën e paraburgimit prej 30 ditësh, pasi i njëjti dyshohet se ishte duke planifikuar vrasjen e disa nxënësve në shkollën e tij.

Caktimi i masës së paraburgimit u bë ditën e diel nga Gjykata Themelore në Prishtinë, por kundër këtij vendimi ka parashtruar ankesë avokati i të miturit, Gëzim Kollçaku.

Kështu ka konfirmuar Kollçaku gjatë një prononcimi për Telegrafin.

“Po ditën e hënë kam parashtruar ankesë. Ajo çfarë është më e rëndësishmja se Prokuroria dhe Policia nuk kanë gjetur asnjë armë”, tha ai.

Avokati Kollçaku po ashtu ka deklaruar se klienti i tij nuk ka pasur konflikte me askënd.

Lexo po ashtu Prokuroria jep detaje për planin disa mujor që 16 vjeçari kishte përgatitur ta kryente në një shkollë në Pejë

Ndryshe, Prokuroria Speciale, ka njoftuar se i dyshuari B.M për disa muaj kishte bërë plane për ndërmarrjen e një sulmi të gjerë ndaj nxënësve të një shkolle në Pejë.

“Prokuroria Speciale e Republikës së Kosovës (PSRK), njofton opinionin publik se është ndaluar i pandehuri me inicialet B.M. për shkak se në periudhë kohore disamujore ka bërë plane dhe është përgatitur për ndërmarrjen e një sulmi të gjerë ndaj disa nxënësve të një shkolle në Pejë”, thuhet në njoftimin e PSRK-së.

Prokuroria Speciale shton se me këto veprime i pandehuri B.M. kishte për të kryer veprën penale ‘’Përgatitja e veprave terroriste ose veprave penale kundër rendit kushtetues dhe sigurisë së
Republikës së Kosovës’’, nga neni 138 lidhur me nenin 129 të Kodit nr. 06/L-074 Penal të Republikës së Kosovës (KPRK). /Telegrafi/