Përplasja Kurti-Brnabiq, Bosch: Kur do ta kuptojnë ndërkombëtarët lojën dinake të Serbisë?

Ish-ambasadori i Holandës në Kosovë, Robert Bosch, ka thënë se presidenti i Serbisë, Aleksander Vuçiq e ka hedhur poshtë marrëveshjen e Ohrit në ditën që ishte hartuar dhe për këtë nuk është qortuar nga ndërkombëtarët.

Diplomati që shërbeu në Kosovë ka pyetur se kur do ta kuptojnë ndërkombëtarët lojën dinake të Serbisë.

“Kur do të ketë drejtësi në rajon”, ka pyetur Bosch.

“Një tjetër dëshmi e lojës dinake që po luan Serbia: për ta normalizimi do të thotë Kosova pjesë e Serbisë! Kur do ta kuptojnë më në fund ndërkombëtarët? Vuçiq e hodhi poshtë marrëveshjen e Ohrit në të njëjtën ditë që ishte hartuar dhe as nuk u qortua për këtë. Kur do të ketë drejtësi në rajon?”, ka shkruar Bosch në Facebook, transmeton Telegrafi.

Ish-ambasadori i Holandës në Kosovë ka reaguar pas përplasjes në mes të kryeministrit Albin Kurti, dhe kryeministres së Serbisë Ana Bernabiq, në forumin e Bledit në Slloveni.

“Bërnabiq i tha panelit të liderëve të Ballkanit Perëndimor se Kosova dhe Serbia janë një vend, jo dy, duke shtuar se Kosova nuk është anëtare e OKB-së dhe se dyshon se do të jetë anëtare e Bashkimit Evropian, të paktën për sa kohë që dy shtete nuk e njohin”.

“Sipas kryeministres serbe, normalizimi i marrëdhënieve mes Beogradit dhe Prishtinës, serbëve dhe shqiptarëve dhe gjithë rajonit është lart në listën e prioriteteve të Serbisë. Ajo tha se e vetmja gjë që Prishtina është dashur të bëjë sipas Marrëveshjes së Brukselit e cila është nënshkruar në vitin 2013 është formimi i një Bashkësie të Komunave Serbe gjë që ende nuk është bërë”, ka shkruar diplomati holandez.

“Kurti është përgjigjur duke thënë se për të Marrëveshja e Brukselit nuk ekziston. Ai shtoi se ka ardhur koha që të gjashtë vendet e Ballkanit Perëndimor të njohin njëra-tjetrën”, ka shkruar ai.

Kryeministri i Kosovës, Albin Kurti në Forumin Strategjik “Bled 2023” në Slloveni gjatë fjalës së tij, të hënën, ka pasur një polemikë me kryeministren e Serbisë, Ana Brnabiq pasi ajo e quajti Kosovën pjesë të Serbisë.

Lexo po ashtu Kurti përplaset me Brnabiqin në Slloveni: Serbia as sanksione nuk i ka vendosur Rusisë

“Së pari duhet të them se është vendi im nuk janë dy vende, Kosova e ashtuquajtura Republika e Kosovës nuk është vend ndërkombëtarisht i njohur, nuk është pjesë e OKB-së. Dyshoj se do bëhet pjesë e BE-së, së paku jo derisa të ketë njohje nga vendet e BE-së”, ka thënë Brnabiq.

Pas kësaj deklarate, Kurti ka thënë se Kosova ka vënë sanksione ndaj Rusisë, ndërsa Serbia as nuk po i mendon dhe nuk janë distancuar nga Millosheviqi as nga Putini.

“Ata nuk u distancuan as nga Millosheviqi, as nga Putini. Pra, nuk e kemi lehtë. Unë dua t’i normalizoj marrëdhëniet dhe këtë do ta bëja menjëherë po të ishte, p.sh., Republika Çeke fqiu im”.

Kurti ka thënë se mbështetja në Kosovë për BE-në është 95% ndërsa në Serbi 35%.

“Mbështetja në Kosovë për BE-në është 95%, në Serbi është 35%. Ne kemi vendosur sanksione kundër Federatës Ruse. Serbia as që po e mendon një gjë të tillë”.

Gjatë kësaj deklarate të Kurtit kanë duartrokitur të pranishmit, teksa ka thënë se “nuk është e lehtë për ne. Dua t’i normalizoj marrëdhëniet dhe do ta bëja menjëherë këtë, nëse fqinjët e mi do ishin çekë e jo serbë”. /Telegrafi/