Municionet thërrmuese do të përdoren vetëm për pastrimin e territorit të okupuar

Municionet thërrmuese do të përdoren në mënyrë rigoroze për pastrimin e territorit të okupuar prej rusëve, tha për Radion Evropa e Lirë, zëdhënësi i grupit operativo-strategjik Tavria, Valerii Shershen.

Predha të diskutueshme nuk do të përdoren në qytete, zona me popullsi të dendur ose në territorin rus, shtoi ai.

Sipas Shershen, armatimi i sapo siguruar do të “ndryshojë në mënyrë vendimtare situatën” në front, raporton skynews.

Lexo po ashtu Çfarë dihet për municionet thërrmuese që SHBA-ja do ta furnizojë Ukrainën?

“(Munionet thërrmuese) do të demotivojnë më tej ushtrinë pushtuese ruse dhe do të ndryshojnë rrënjësisht situatën në favor të forcave mbrojtëse të Ukrainës”, komentoi ai.

Si Uashingtoni ashtu edhe Kievi kanë konfirmuar se ushtria ukrainase ka marrë tashmë municione thërrmuese, por ende nuk janë shfrytëzuar në luftë.

Ndryshe, ky lloj armatimi zakonisht lëshon një numër të madh bombash më të vogla që mund të vrasin pa dallim në një zonë të gjerë.

Ato që nuk arrijnë të shpërthejnë përbëjnë një rrezik për dekada pas përfundimit të armiqësive. /Telegrafi/