Mbërrijnë në Ukrainë armët e shumëpërfolura nga SHBA

Një gjeneral ukrainas konfirmoi sot për CNN se Ukraina mori municione thërrmuese nga SHBA.

“Sapo i kemi marrë. Nuk e kemi përdorur ende, por mund të ndryshojë rrënjësisht situatën në fushëbetejë”, tha gjenerali Oleksandr Tarnavskyi, transmeton Telegrafi.

“Dhe armiku e di që ne do të kemi përparësi me këtë armë, do të na lënë pjesën e terrenit ku mund ta përdorim. Kjo është një armë shumë e fuqishme, autoritetet më të larta do të vendosin se ku do ta përdorim”, shtoi ai.

Tarnavskyi theksoi se nuk do të përdorë municione thërrmuese në zonat me popullsi të dendur, edhe nëse ato do të pushtoheshin nga forcat ruse.

SHBA njoftoi se kishte marrë një garanci me shkrim se Ukraina nuk do t’i përdorte këto armë në zonat e populluara, dhe se operacionet e çminimit do të kryheshin pas përfundimit të luftës.

Lexo po ashtu Parlamenti Evropian miratoi me shumicë dërrmuese planet për prodhim më të madh të municioneve

“Rusët mendojnë se ne do ta përdorim atë në të gjitha fushat e vijës së frontit. Kjo nuk është aspak e vërtetë. Por ata janë shumë të shqetësuar”, tha gjenerali ukrainas.

SHBA thotë se dërgoi municione thërrmuese në Ukrainë për shkak të furnizimit të ulët të raketave standarde të artilerisë.

“Furnizimi i municioneve thërrmuese është i përkohshëm. Sapo prodhimi i raketave të arrijë një nivel që mund të plotësojë nevojat e Ukrainës, atëherë nuk do të ketë nevojë të dërgohen armë shtesë thërrmuese”, tha të martën Jake Sullivan, këshilltari i Sigurisë Kombëtare i SHBA.