PDK kërkon shpërbërjen e Kuvendit: Është koha që vendi të shkoj në zgjedhje

Partia Demokratike e Kosovës ka thënë se është koha që vendi të shkoj në zgjedhje të parakohshme.

Kështu është shprehur shefi i grupit parlamentar të PDK-së, Abelard Tahiri pas mbledhjes së Kryesisë së Kuvendit.

“Ky Kuvend nuk e meriton as edhe një ditë të vetme të shfrytëzoj taksat e qytetarëve kur është kaq jofunksional. Si grup parlamentar i PDK-së dhe si parti tashmë kemi një vendim ku ne kërkojmë që ky Kuvend jofunksional i cili po i shkakton më shumë dëm kësaj Republike sesa po ndihmon në një qeverisje të mirë, duhet të shpërbëhet sa më parë. I kemi dhënë edhe mundësinë kryeministrit nga java e kaluar ose ta shpërbëj Kuvendin ose të japë dorëheqje, dhe koha është që vendi ynë të shkoj në zgjedhje të parakohshme”, tha Tahiri.

Lexo po ashtu Nënkryetarët e PDK-së dhe LDK-së bojkotojnë mbledhjen e Kryesisë së Kuvendit

Ai shtoi se çdo ditë e më shumë po thellohet kriza dhe vendi ynë po sanksionohet qoftë nga SHBA-ja dhe BE-ja e po ashtu edhe nga vendet e BE-së veç e veç.

Tahiri gjithashtu bëri të ditur se si grup parlamentar nuk do të votojnë asnjë marrëveshje në Kuvend.

“Ne nuk mund të mbijetojmë të izoluar dhe nuk e kemi ndërmend ta ndihmojmë izolimin. Ne si grup nuk do të votojmë as marrëveshjet ndërkombëtare, as projektligjet as strategjitë me qëllimin e vetëm që sa më shpejtë ta dërgojmë vendin në zgjedhje dhe ta largojmë këtë qeveri të paaftë”, tha ai. /Telegrafi/