Trump për rebelimin e Wagnerit: Putini u dobësua, për t’u arritur paqja – Ukraina ndoshta duhet t’i jap disa territore

Ish-presidenti i SHBA-së, Donald Trump, tha dje se presidenti rus është “dobësuar disi” nga kryengritja e ndërprerë dhe se tani është koha që SHBA të përpiqet të ndërmjetësojë një marrëveshje paqeje midis Rusisë dhe Ukrainës.

“Dua që njerëzit të ndalojnë së vdekuri për shkak të kësaj lufte qesharake”, tha Trump në një intervistë telefonike me Reuters.

Duke folur gjerësisht për politikën e jashtme, kandidati kryesor i sondazhit për nominimin presidencial republikan për vitin 2024, tha gjithashtu se Kinës duhet t’i jepet 48 orë kohë për të nxjerrë atë që burime të njohura me këtë çështje thonë se janë aftësitë kineze të spiunazhit në Kubë, e cila është 145 kilometra larg brigjeve të SHBA, transmeton Telegrafi.

Sa i përket Ukrainës, Trump nuk përjashtoi mundësinë që qeveria në Kiev do t’i duhet t’i dorëzojë Rusisë disa territore, për të ndaluar luftën që filloi me pushtimin e Ukrainës nga forcat ruse 16 muaj më parë.

Ai tha se gjithçka do të ishte “e negociueshme” nëse do të ishte president, por se ukrainasit që luftuan fort për të mbrojtur vendin e tyre “meritonin shumë lëvdata”.

“Mendoj se ata do të kishin të drejtë të mbanin një pjesë të madhe të asaj që meritonin dhe mendoj se edhe Rusia do të pajtohej me këtë. Ju keni nevojë për një ndërmjetës të vërtetë, domethënë një negociator, dhe ne nuk e kemi një të tillë për momentin”, pohoi ai.

Presidenti i SHBA, Joe Biden dhe aleatët e NATO-s duan që Rusia të largohet nga territori që ka kapur në lindje të Ukrainës.

Ukraina ka nisur një kundërofensivë që ka parë pak sukses në dëbimin e forcave ruse. Presidenti ukrainas Volodymyr Zelensky propozoi një plan paqeje prej 10 pikash vitin e kaluar, i cili i bën thirrje Rusisë të tërheqë të gjitha trupat e saj.

“Mendoj se gjëja më e madhe që SHBA duhet të bëjë tani është të bëjë paqe – të bashkojë Rusinë dhe Ukrainën dhe të bëjë paqe. Ju mund ta bëni këtë. Është koha për ta bërë këtë, që të dy palët të bashkohen për të arritur paqen”, tha Trump.

Gjithashtu theksoi se Putini u dëmtua nga rebelimi i Wagner, ushtria mercenare ruse dhe lideri i saj Yevgeny Prigozhin, që ndodhi fundjavën e kaluar.

“Mund të thuash se ai (Putini) është ende atje, ai është ende i fortë, por sigurisht, do të thosha, disi është dobësuar”, tha ai.

“Megjithatë, nëse Putini nuk do të ishte më në pushtet, “nuk e dini se cila është alternativa. Mund të ishte më mirë, por mund të ishte edhe shumë më keq”, tha Trump.

Lidhur me akuzat për krime lufte të ngritura kundër Putinit nga Gjykata Penale Ndërkombëtare marsin e kaluar, Trump tha se fati i Putinit duhet të diskutohet kur të përfundojë lufta “sepse tani, nëse e ngrini atë, nuk do të bëni kurrë paqe, nuk do të arrijmë kurrë marrëveshje”. /Telegrafi/