Operacion policor në një fshat të Podujevës, sekuestrohen armë dhe municione

Realizohet një operacion policor me urdhër kontrolli të gjykatës në një fshat të Podujevës, sekuestrohen armë dhe municione nga Policia e Kosovës.

Policia e Kosovës në bashkëpunim me Prokurorinë, të asistuar edhe nga njësitet tjera të stacionit policor në Podujevë dhe njësinë K9,  duke u bazuar në Urdhër Kontrollin e lëshuar nga Gjykata, kanë realizuar  një operacion kontrolli në një lokacion në një fshat të Podujevës, me ç‘rast ka rezultuar me arrestimin e një personi të dyshuar për “trafikim me armë”.

Policia njofton se gjatë këtij operacioni policor është kontrolluar një shtëpi banimi dhe janë sekuestruar provat/dëshmitë materiale: dy armë të shkurta (revole), një armë e gjatë (ajrore), njëzet e pesë fishekë, dhjetë krehër të karikatorit (për armë të gjata), një kuti e mbushur me barut dhe një sasi e predhave sferike për fishekë të gjuetisë.

Poashtu është sekuestruar edhe pajisje për shtypjen (gravim) të shkronjave dhe numrave në armë (metal).

Me vendim të Prokurorit pas intervistimit personi i dyshuar ndalet në mbajtje për 48 orë për proceduar të mëtejme ligjore./Telegrafi/