SHBA njofton tjetër ndihmë ushtarake të fuqishme – Ukraina thotë se aeroplanët luftarakë mund të arrijnë deri në fund të vitit

SHBA ka zbuluar një tjetër paketë mbështetjeje për Ukrainën, me vlerë deri në 500 milionë dollarë.

Sipas mediave të huaja, përcjell Telegrafi, paketa do të përfshijë automjete luftarake Bradley, transportues të blinduar të personelit Stryker dhe municione për sistemet raketore të artilerisë me lëvizshmëri të lartë (HIMARS), tha Pentagoni në një deklaratë.

Paketa është një shfaqje e mbështetjes për Kievin pasi Moska po merret me pasojat e një rebelimi nga luftëtarët mercenar.

SHBA ka qenë ofruesi më i madh i ndihmës ushtarake për Ukrainën, duke dhënë dhjetëra miliarda dollarë që nga fillimi i luftës.

Ndërkohë Ukraina thotë se është ‘absolutisht realiste’ se mund të ketë aeroplanë luftarakë deri në fund të vitit.

Një ndihmës i lartë i presidentit ukrainas ka shprehur besimin se vendi i tij do të marrë aeroplanë luftarakë F-16 të prodhuar nga SHBA-ja në muajt e ardhshëm.

Andriy Yermak, kreu i stafit presidencial të Ukrainës, u tha gazetarëve: “Unë besoj se është absolutisht realiste që Ukraina të fillojë të marrë aeroplanë deri në fund të vitit”.

Yermark tha se aleatët e Ukrainës janë “gati për të ofruar” aeroplanët – por aktualisht ka disa “çështje teknike”.

Ndërsa ministri i mbrojtjes i Ukrainës, Oleksii Reznikov tha më parë se ai priste që pilotët ukrainas të fillonin stërvitjen me aeroplanët luftarakë në korrik të këtij viti.

Danimarka dhe Holanda kanë thënë gjithashtu se do të jenë të gatshme të trajnojnë pilotët ukrainas në aeroplanë. /Telegrafi/