Botë Ballkan Turqia

Voton Turqia, Erdogan kundër Kilicdaroglu dhe beteja e madhe për parlament

Para 2 vitesh

Sot në Turqi mbahen zgjedhjet e përgjithshme, ku qytetarët e këtij vendi do të zgjedhin anëtarët e rinj të parlamentit, si dhe presidentin, i cili duhet të marrë një mandat pesëvjeçar.

Fushata zgjedhore në këtë vend u karakterizua nga një diskutim intensiv mes zyrtarëve të partisë në pushtet AK dhe përfaqësuesve të partive opozitare, transmeton Telegrafi.

Ashtu si në shumë vende të tjera, skena politike turke nuk mund të kalonte pa akuza dhe ballafaqime të ndërsjella, ku shpesh programet politike shkëmbeheshin me ofendime në nivel personal.

Kur bëhet fjalë për zgjedhjet presidenciale, duke marrë parasysh sistemin politik turk dhe reformat kushtetuese që u kryen në vitin 2018, roli i presidentit ka ndryshuar ndjeshëm dhe ka fituar rëndësi, dhe për këtë arsye fokusi i publikut, si në Turqi ashtu edhe në botë, ishte në kandidatët për këtë nivel.

Presidenti aktual i Turqisë, Recep Tayyip Erdogan dhe përfaqësuesi i opozitës së bashkuar dhe presidenti i Partisë Popullore Republikane, Kemal Kiliçdaroglu, do të kryqëzojnë shtizat në luftën për presidencën.

Gjatë fushatës elektorale, kandidatët janë fokusuar te masat ekonomike, por ka pasur edhe akuza të ndërsjella. Presidenti i Turqisë, Recep Tayyip Erdogan, i cili ka qenë në detyrë që nga viti 2014, në fushatën e tij elektorale akuzoi kandidatin e opozitës për bashkëpunim me terroristët dhe për përpjekje për t’ia dorëzuar Turqinë sërish Fondit Monetar Ndërkombëtar dhe shumë “parashqitësve” perëndimorë.

“Ne nuk do të lypim para nga huadhënësit në Londër siç bëri Kemal. Nuk do t’ia dorëzojmë më ekonominë Fondit Monetar Ndërkombëtar. Në 21 vjet kemi futur investimet më të mëdha në vendin tonë dhe kemi zbatuar projekte në secilin prej tyre. 81 provincat. Ne e kemi çliruar veten nga paqëndrueshmëria politike, grusht-shtetet dhe krizat. Asnjëherë nuk jemi dorëzuar para politikës së pengimit me të cilën jemi përballur. Nuk jemi dorëzuar para politikës së sabotimit me të cilën jemi përballur. Kemal Kilicdaroglu mund t’i flasë huadhënësve në Londër kur të dojë, por ai do t’i humbë këto zgjedhje”, tha Erdogan në një nga mitingjet.

Nga ana tjetër, Kemal Kilicdaroglu do të jetë përfaqësuesi i gjashtë partive opozitare që u bashkuan në luftën kundër partisë AK dhe presidentit Erdogan në prag të zgjedhjeve.

Në programin e tij parazgjedhor, Kilicdaroglu i kushtoi vëmendje të madhe rinisë, por edhe grupeve etnike që, sipas tij, Erdogani i ka shtypur për dekada.

“Të rinjtë duan demokracinë. Ata nuk duan një politikë ku policia do t’u trokasë në derë në mëngjes sepse kanë postuar diçka në Twitter. Unë u them të rinjve se mund të më kritikojnë lirisht. Unë do të luftoj për ta siguruar këtë të drejtë dhe do të shkoj në rrugën time pavarësisht se çfarë mendojnë Erdogan dhe partnerët e tij për këtë? Ata nuk mund të më fshehin. Nuk mund të më trembin. Unë i bëra një premtim kombit”, tha Kilicdaroglu.

Përveç zgjedhjeve për president të Turqisë, qytetarët e këtij vendi do të zgjedhin edhe deputetët e ri të parlamentit, pra Asamblenë e Madhe Kombëtare, e cila ka 600 përfaqësues. Në zgjedhje janë regjistruar gjithsej 24 parti dhe përveç tyre do të marrin pjesë edhe një numër i madh kandidatësh të pavarur. /Telegrafi/