“Tensionet me Rusinë do të rriten” pasi Finlanda të anëtarësohet në NATO, paralajmëron ish-kreu i ushtrisë britanike

“Tensionet do të rriten” pasi Finlanda të anëtarësohet në NATO, ka paralajmëruar ish-shefi i shtabit të përgjithshëm të Britanisë, Gjenerali Lord Richard Dannatt.

Paralajmërimi i tij vjen pasi Finlanda do të bëhet sot anëtarja e 31-të e NATO-s.

Veç kësaj, ai ka thënë për Sky News se pret që NATO të bëjë dislokime parandaluese përgjatë kufirit finlandez rreth 1300 kilometra me Rusinë, përcjell Telegrafi.

Lexo po ashtu Finlanda do të anëtarësohet zyrtarisht në NATO të martën

Udhëheqësit perëndimorë duhet të theksojnë se NATO është thjesht një pakt mbrojtës, tha ai.

Ai shpjegoi: “Putini mund të përpiqet t’i tregojë popullit të tij se NATO po zgjerohet – teknikisht kjo është e saktë – por pse po zgjerohet?

“Për shkak se ekziston një shqetësim në rritje midis vendeve si Finlanda dhe Suedia se Rusia përfaqëson një kërcënim për ta dhe prandaj nuk është e paarsyeshme që këto dy vende të kërkojnë mbrojtjen e përgjithshme të ombrellës së NATO-s”.

Në përgjigje të masës, Rusia ka thënë se do të forcojë kapacitetin e saj ushtarak në rajonet perëndimore dhe veriperëndimore, njoftoi agjencia shtetërore e lajmeve RIA.

Lexo po ashtu Vjen reagimi i Moskës pas lajmit se të martën Finlanda do të bëhet anëtar i NATO-s

“Do të ketë tensione dhe sigurisht ato tensione do të rriten, çuditërisht, kur në një moment në të ardhmen vendet e tjera të NATO-s do të bëjnë dislokime parandaluese në territorin finlandez përgjatë kufirit rus”, citohet të ketë thënë Lord Dannatt.

Në anën tjetër, Finlanda sjell “mbështetje morale” për NATO-n, në vend të kapacitetit ushtarak, shtoi ai.

Ai tha se vetë aleanca po merr përgjegjësi shtesë, por është gjëja e duhur për t’u bërë dhe ai është “personalisht i kënaqur” që një gjë e tillë ka ndodhur. /Telegrafi/