Finlanda është e hapur për t’i dhënë Ukrainës aeroplanë luftarakë

Mediat në Finlandë kanë raportuar se kryeministrja Sanna Marin është e gatshme të diskutojë sigurimin e aeroplanëve luftarakë për Ukrainën.

Marin, e cila vizitoi Kievin më 10 mars, tha se Helsinki planifikon të blejë 64 aeroplanë modernë F-35A për t’i zëvendësuar 62 aeroplanë Hornet – të cilët, sipas saj, mund t’i jepen Ukrainës, por tha se diskutimet janë në një fazë fillestare.

Për muaj të tërë, Ukraina ka kërkuar aeroplanë modernë luftarakë nga aleatët e saj.

Gjatë bisedimeve në Paris më 8 shkurt, presidenti ukrainas, Volodymyr Zelensky, u bëri thirrje në mënyrë specifike liderëve perëndimorë që të siguronin aeroplanë luftarakë.

“Unë ju bëj thirrje juve dhe botës, me fjalët e thjeshta por të rëndësishme – aeroplanë luftarakë për Ukrainën, krahë për lirinë”, tha ai.

Por, Shtetet e Bashkuara të Amerikës dhe Gjermania u shprehëm kundër kësaj kërkese.

Kancelari gjerman, Olaf Scholz, tha se Gjermania nuk do të dërgojë avionë luftarakë në Ukrainë.

Gjithashtu, presidenti amerikan, Joe Biden, tha se SHBA-ja nuk do të dërgojnë aeroplanë luftarakë F-16 në Ukrainë.

Por, presidenti francez, Emmanuel Macron, tha se Franca nuk e përjashton dërgimin e tyre nëse plotësohen disa kushte.

Më 6 mars, kryeministri i Letonisë, Krisjanis Karins, tha se është në favor të furnizimit të Ukrainës me aeroplanë luftarakë.

Në janar, Gjermania u pajtua për të dërguar tanke Leopard 2 në Ukrainë dhe për të lejuar vendet e tjera evropiane të dërgonin të tyret, pas disa javësh debat intensiv dhe presion në rritje nga aleatët.

Ukraina ka muaj që kërkon tanke luftarake, për të luftuar forcat ruse që e kanë nisur luftën në këtë shtet.

Polonia, Spanja, Finlanda, Holanda dhe Norvegjia dhe disa shtete të tjera pritet që këtë muaj të dërgojnë tanket e tyre Leopard në Ukrainë. /REL/