Real Madridi refuzon të bashkëpunojë me UEFA-n për rimbursimin e biletave të blera për finalen e Ligës së Kampionëve

Real Madridi nuk do të bashkëpunojë në procesin e rimbursimit të UEFA-s për tifozët që morën pjesë në finalen e Ligës së Kampionëve të vitit të kaluar, duke thënë se kompensimi i propozuar nga UEFA ishte “i pamjaftueshëm”.

Finalja në Paris u vonua me 36 minuta pasi mijëra tifozë të Liverpoolit nuk mundën të futeshin në “Stade de France” për ndeshjen e 28 majit, të cilën Real Madrid e fitoi 1-0.

Policia franceze u filmua duke përdorur gaz lotsjellës ndaj tifozëve, përfshirë gra dhe fëmijë.

Edhe pse UEFA fillimisht fajësoi tifozët e klubit anglez për kaosin, organi drejtues më vonë kërkoi falje pas publikimit të një rishikimi të pavarur.

Të martën, UEFA tha se do të rimbursonte tifozët e Liverpoolit që morën pjesë në finalen e vitit të kaluar në Paris dhe klubi anglez konfirmoi se do të zbatonte një skemë rimbursimi për të mbuluar të gjitha biletat e klubit për finalen.

Lexo po ashtu UEFA rimburson paratë për tifozët e Liverpool që blenë bileta për finalen e Ligës së Kampionëve 2022

Sipas UEFA-s, tifozët e Real Madridit dhe tifozët neutralë që plotësojnë kriteret e rimbursimit do të rimbursohen, por klubi nuk ka pranuar bashkëpunimin, duke thënë se kompensimi i propozuar është i pamjaftueshëm.

Biletat për finalen kushtojnë nga 74 deri në 733 dollarë. /Telegrafi/