Shefi i NATO-s, Stoltenberg: Putin nuk është i interesuar për paqe në Ukrainë

Ndërsa pushtimi i udhëhequr nga Rusia në Ukrainë po i afrohet vitit të tij të dytë, nuk ka “asnjë shenjë” se presidenti rus, Vladimir Putin ka ndryshuar ambiciet e tij, thotë Sekretari i Përgjithshëm i NATO-s, Jens Stoltenberg.

Duke folur për CNN në Konferencën e Sigurisë në Mynih të Gjermanisë, ai tha se “ne shohim të kundërtën. Ai nuk po planifikon të arrijë paqe. Ai po bën plane për më shumë luftë”.

Stoltenberg vuri në dukje luftën në qytetin lindor të Ukrainës, Bakhmut, ku forcat ruse, të ndihmuara nga grupi mercenar Wagner, kanë intensifikuar sulmet e tyre që kur morën nën kontroll qytetin fqinj të minierave të kripës, Soledar, një muaj më parë.

Lexo po ashtu Ukrainasit kanë shkatërruar një tjetër tank rus T-90 Proboj

“Nëse kjo është ofensiva e madhe pranverore apo nëse është thjesht një lloj preludi për këtë, është pak e vështirë të thuhet”, shtoi ai, “Por ata po ‘shkrijnë’ gjithnjë e më shumë trupa dhe armë”.

Stoltenberg tha se ndërsa është e paqartë se si do të përfundojë lufta, ajo për të cilën ai është i sigurt është rëndësia e mbështetjes ushtarake perëndimore për Ukrainën.

“Nëse doni që Ukraina të mbizotërojë si një komb sovran dhe nëse dëshironi një zgjidhje paqësore të negociuar nesër, atëherë duhet të ofroni mbështetje ushtarake sot”, deklaroi norvegjezi.

Ndryshe, Rusia ka nisur pushtimin e pajustifikueshëm të shtetit ukrainas më 24 shkurt duke shkaktuar mijëra viktima dhe dëme të shumta materiale. /Telegrafi/