Çmimet e gazit natyror në Evropë bien pas 18 muajsh

Çmimi i gazit natyror në Evropë ka rënë në nivelin e tij më të ulët që nga fillimi i agresionit rus. Çmimet standarde të shitjes me shumicë të gazit ranë pothuajse 5 për qind ose me 50 euro për megavat orë, niveli i tyre më i ulët që nga shtatori i 2021-së.

Është një kthesë e jashtëzakonshme për një kontinent që vetëm pak muaj më parë, u përball me mungesa, pasi Rusia dikur furnizuesi i saj më i madh uli në mënyrë drastike eksportet e gazit në Evropë si hakmarrje për sanksionet e Bashkimit Evropian.

Rënia e çmimeve do të zvogëlojë më tej rrezikun e një recesioni në Evropë. Çmimet janë ulur nga moti jashtëzakonisht i ngrohtë këtë dimër, si dhe nga përpjekjet e shumta të rajonit për të kursyer gazin, për të gjetur furnizues alternativë dhe për të mbushur depozitat.

Objektet e magazinimit në të gjithë Bashkimin Evropian aktualisht janë në nivelin 65 për qind dhe kjo është më shumë se 45 për qind që BE-ja ka mesatarisht. Blloku ka rritur gjithashtu importet e gazit natyror të tubacionit nga Norvegjia dhe të gazit natyror të lëngshëm kryesisht nga Shtetet e Bashkuara dhe Katari. Çmimet e gazit verën e kaluar ishin aq të shtrenjta saqë ishin të barasvlershme me gati 500 dollarë për fuçi naftë.

Ekonomistët shprehen se Evropa duhet të shmangë një krizë energjetike për dimrin e ardhshëm, nëse ajo ruan nivelet e saj aktuale të importit nga furnizuesit jo ruse, konsumi i gazit mbetet 20 për qind nën nivelet mesatare dhe prodhimi vendas i gazit mbetet i njëjtë. Megjithatë faturat për shumë familje evropiane nuk kanë gjasa të bien aq shpejt. Rritja e çmimeve të gazit kishte nxitur një krizë të kostos së jetesës dhe inflacion të lartë që kur Rusia ndali furnizimet.

Nga ana tjetër, kërkesa për gaz në Kinë mund të rritet përsëri këtë vit, duke shtrënguar tregun botëror të gazit natyror të lëngshëm dhe duke ushtruar presion në rritje mbi çmimet. Ekonomia e dytë më e madhe në botë hoqi dorë nga politika e saj e rreptë për zero COVID-19 në muajin dhjetor pas më shumë se tre vjetësh, duke rritur vlerësimet për rritjen ekonomike. /Telegrafi/