Dialogu dhe marrëveshja finale – Kurti diskuton me zyrtarët e BE-së dhe senatorë amerikanë në Mynih të Gjermanisë

Kryeministri i Kosovës, Albin Kurti po qëndron për vizitë në Gjermani ku po merr pjesë në Konferencën e Mynihut.

Në kuadër të punimeve të kësaj konference, Kurti ka zhvilluar disa takime me zyrtarët e Bashkimit Evropian e senatorë amerikanë.

Gjatë të shtunës kryeministri Kurti është takuar me përfaqësuesin e lartë të BE-së, Josep Borrell dhe përfaqësuesin për dialog, Miroslav Lajçak.

Në takimin me zyrtarët e lartë të BE-së është diskutuar për procesin e dialogut dhe propozimin evropian, të iniciuar nga Franca dhe Gjermania dhe të mbështetur nga Shtetet e Bashkuara të Amerikës dhe Italia.

Gjithashtu është diskutuar edhe për takimin e radhës së nivelit të lartë mes kryeministrit të Kosovës, Albin Kurti dhe presidentit serb, Aleksandër Vuçiq që u caktua të mbahet më 27 shkurt në Bruksel.

“U takova me Kurtin në Konferrencën e Mynihut për Siguri për të diskutuar për nevojën për avancim të propozimit të BE-së për normalizim raportesh me Serbinë, që është kyç për rrugën e Kosovës drejt BE-së. Do të takohemi në Bruksel për takim në nivel të lartë më 27 shkurt”, ka shkruar Borrell në Twitter, transmeton Telegrafi.

Gjatë pjesëmarrjes së tij në Konferencën e Mynihut, Kurti zhvilloi takime edhe me senatorë amerikanë.

Kryeministri u takua me seantorët Bob Menendez, njëherësh Kryetar i Komisionit të Senatit të Shteteve të Bashkuara për Marrëdhëniet me Jashtë, Jeanne Shaheen dhe Chris Van Hollen.

Me seantorin Menendez, Kurti ka diskutuar për marrëdhëniet bilaterale, partneritetin e ngushtë ndërmjet dy vendeve dhe fuqizimin e mëtejmë të tij.

Kryeministri dhe senatori kanë biseduar edhe për procesin e dialogut, raportin me Serbinë dhe propozimin evropian, me ç’rast, Kurti e njoftoi senatorin Menendez për qëndrimet e Qeverisë së Republikës së Kosovës dhe konstruktivitetin e treguar përgjatë tërë procesit.

Në anën tjetër, gjatë takimit të Kurtit me seantorët Jeanne Shaheen dhe Chris Van Hollen, u diskutua për përparimin e shënuar në sundim të ligjit, luftim të korrupsionit, demokratizim të institucioneve dhe zhvillim ekonomik.

Në takim u diskutua për situatën e sigurisë në Ballkanin Perëndimor dhe zhvillimet e fundit në rajon. Temë diskutimi ishte edhe procesi i dialogut mes Kosovës dhe Serbisë.

Kryeministri i Kosovës ka pasur takim edhe kancelarin gjerman, Olaf Scholz.

Në njoftimin për media thuhet se u fol për raportet ndërmjet Kosovës dhe Serbisë, për përgatitjet për takimin e radhës në Bruksel, si dhe për propozimin evropian për normalizim të marrëdhënieve, të pranuar tashmë si bazë e mirë për diskutime të mëtejme dhe kornizë solide për të ecur përpara. /Telegrafi/