Babai i tij luajti me Maradonën, ai luan me Messin: Mac Allister tregon se si kapiteni i Argjentinës ua ndaloi lojtarëve të tjerë ta thërrisnin ‘Xhenxhefil’

Alexis Mac Allister është një nga lojtarët që ka bërë përshtypje me lojën e tij te Argjentina në fazën e grupeve. Ai ka prejardhje irlandeze, ndërsa edhe babai i tij ishte futbollist, ku ndau fushën me Diego Armando Maradonan. Mac Allister ka folur edhe për takimin e parë me Lionel Messi dhe fjalët e kapitenit ndaj bashkëlojtarëve argjentinas që mesfushorin e thërrisnin ‘Xhenxhefil’ shkaku i dukjes së tij.

Argjentina ka kaluar fazën e grupeve si lider i grupit, duke fituar takimin e fundit ndaj Polonisë me rezultat 2-0.

Mesfushori sulmues i Brighton, shënoi për Argjentinën në ndeshjen e tyre në Kupën e Botës kundër Polonisë të mërkurën mbrëma, ndërsa mori ftesën e tij të parë në ekipin kombëtar në gusht 2019. Ai ka kënaqësinë të punojë me kapitenin Leo Messi.

Në fakt, përpara debutimit të tij për La Albiceleste kundër Kilit në Los Angeles Coliseum, Mac Allister ishte nervoz për takimin me Messin, që ishte takimi i tyre i parë.

“Isha i kuq, krejtësisht i kuq. Nuk doja as të përshëndesja. Isha shumë nervoz, por kur takova një nga lojtarët më të mirë në botë, ishte fantastike, sigurisht”.

“Është diçka që nuk do ta harroj. Është sikurse magji, pasi babai im luajti me Maradonën, ndërsa unë isha në stërvitje me Lionel Messin. Ne jemi shumë krenarë për këtë gjë”, kishte deklaruar ai.

Messi ishte shumë mirëpritës ndaj ish-lojtarit të Argentinos Juniors dhe u hodh në mbrojtje të tij kur lojtarët e tjerë thërrisnin ‘Colo’ – që do të thotë xhenxhefil në Argjentinë, shkaku i pamjes së tij.

Duke e ditur që Mac Allisterit nuk i pëlqente shakaja për pamjen e tij, Messi iu kishte thënë të ndalonin.

“Mbaj mend që të gjithë më thërrisnin ‘Colo’, që i bie xhenxhefil në Argjentinë. Nuk më pëlqen shumë dhe ai u tha bashkëlojtarëve. Ai tha, ‘Nuk i pëlqen të quhet Colo, ndaj mos e quani!”, vazhdoi tregoi i mesfushorit të ri.

Mac Allister mban numrin 10 te Brighton që lidhet me Messin dhe ka edhe një ngjashmëri në pamje me shtatë herë fituesin e Topit të Artë.

Por 23-vjeçari ka historinë e tij unike. Emri dhe flokët e tij vijnë nga prejardhja e tij irlandeze.

Babai i Alexis, Carlos luajti si mbrojtës i majtë për Boca Juniors dhe ishte mik me Diego Maradonan. Edhe ai ishte me pamje të njëjtë sikurse djali i tij.

Familja Mac Allister janë të gjithë futbollist, pasi edhe Kevin dhe Francis, vëllezërit e tij, janë futbollistë profesionist dhe luajnë te Argentino Juniors dhe Rosario Central.

Mac Allister po shkëlqen edhe në Ligën Premier, ku ka luajtur 15 herë për Brightonin këtë sezon, duke shënuar pesë herë në total. /Telegrafi/