Albanese i bëri thirrje Bidenit që ta lirojnë nga akuzat Julian Assange

Kryeministri australian, Anthony Albanese ka thënë se i ka bërë thirrje personalisht qeverisë amerikane që t’i japë fund ndjekjes penale të themeluesit të WikiLeaks, Julian Assange.

Albanese po i përgjigjej pyetjes së një deputeti të pavarur, i cili tha se gazetaria e lirë është në interesin publik dhe “është thelbësore për demokracinë” dhe shtoi se liria e Assange “do të vijë vetëm si rezultat i ndërhyrjes politike”, raporton theguardian.

“Më duhet të siguroj deputetët se unë personalisht e kam iniciuar këtë diskutim me përfaqësuesit e qeverisë amerikane”, u përgjigj Albanese dhe shtoi, “Qëndrimi im është i qartë dhe administratës amerikane i është bërë e qartë se ka ardhur koha që t’i japë fund kësaj çështjeje”.

Albanese nuk tha nëse e ka iniciuar bisedën me presidentin amerikan Joe Biden, në takimin në Bali dy javë më parë apo me përfaqësues të tjerë amerikanë.

Julian Assange, një shtetas australian, po mbahet në burgun Belmarsh në Londër, ndërsa SHBA kërkon ta ekstradojë atë për t’u gjykuar me akuza në lidhje me publikimin e qindra mijëra dokumenteve sekrete mbi luftërat në Afganistan dhe Irak, si dhe kabllogramet diplomatike. /Telegrafi/