Kurti në Madrid flet për raportin me Serbinë: Në 23 vitet e fundit më shumë kemi një armëpushim sesa një paqe të vërtetë

Kryeministri i vendit, Albin Kurti në Kongresin e 26-të të Internacionales Socialiste që po mbahet në Madrid ka folur për situatën e sigurisë në rajon, duke thënë se përbërësi që mungon për paqen në rajonin e Ballkanit Perëndimor është një Serbi demokratike.

Kurti këtë deklaratë e tha në Kongresin e 26-të të Internacionales Socialiste, që këtë fundjavë po mbahet në Madrid, e ku kryetar i ri u zgjodh kryeministri spanjoll, Pedro Sanchez.

“Që nga teoria e famshme e Immanuel Kant mbi marrëdhëniet midis të dyjave, paqja dhe demokracia kanë qenë të lidhura ngushtë në imagjinatën tonë. Teza kantiane, që do të thotë, se republikat demokratike – në krahasim me ato autoritare – priren të jenë paqësore në sjelljen e tyre të jashtme, është njohur në literaturën e marrëdhënieve ndërkombëtare si Teoria Demokratike e Paqes.

Kjo teori sugjeron që republikat demokratike nuk luftojnë me republikat e tjera demokratike, megjithëse ato mund të përfshihen në luftë kundër vendeve jodemokratike.

Përbërësi që mungon për paqen në rajonin e Ballkanit Perëndimor është një Serbi demokratike. Fatkeqësisht, fqinji ynë në veri, dhe ai me të cilin Republika e Kosovës ndan kufirin më të gjatë, është ende një vend autoritar me aspirata territoriale ndaj nesh dhe me lidhje të gjera dhe të afërta me Kremlinin”, tha kryeministri.

Kreu i ekzekutivit të Kosovës tha më tej se që nga mbarimi i luftës në vitin 1999, ata kanë kërcënuar vazhdimisht me sjellje luftarake.

“Deri më sot, ata i mbajnë 48 instalime ushtarake dhe xhandarmërie në të gjithë kufirin e saj me Kosovën. Për më tepër, që nga shpallja e pavarësisë sonë në vitin 2008, ajo është angazhuar vazhdimisht në fushata që synojnë të minojnë shtetësinë tonë. Edhe pse në vitin 2010 Serbia kërkoi mendimin e Gjykatës Ndërkombëtare të Drejtësisë për ligjshmërinë e pavarësisë sonë, ajo ka zgjedhur të mos respektojë gjetjet e gjykatës. Kohët e fundit, ajo është përpjekur të përdorë ndikimin e saj në pjesën veriore të vendit tonë për të minuar sundimin e ligjit në atë regjion”, u shpreh Kurti.

Ai më tej tha se sipas Kantit, një zgjidhje e vërtetë paqeje nuk është e mundur pa anuluar shkaqet ekzistuese të një lufte të ardhshme.

“Është e qartë, pra, se ajo që kemi pasur në 23 vitet e fundit mes dy vendeve tona është më tepër një armëpushim i thjeshtë sesa një paqe e vërtetë. Pyetja e qartë është: si t’i afrohemi paqes së vërtetë.

Unë besoj se forcimi i demokracisë në Serbi është përgjigja. Kjo mund të duket si diçka me pak gjasa për disa, dhe si një e vërtetë e thjeshtë për të tjerët – megjithatë, kjo është mënyra e vetme që ne dimë për të krijuar kushte për paqen afatgjatë. Me një Serbi autoritare që refuzon të pranojë krimet e luftës nga e kaluara e afërt, e lëre më të kërkojë falje për to, madje edhe një modus vivendi është e vështirë të arrihet, e lëre më një paqe e vërtetë përgjatë vijave kantiane.

Megjithatë, ne u angazhuam në dialog të hapur demokratik në Bruksel, të lehtësuar nga Bashkimi Evropian….”, u shpreh ai.

Kryeministri më tha se qeveria që ai udhëheq po fokusohet në zhvillimin e ekonomisë sonë, reformimin e sistemit tonë të drejtësisë dhe forcimin e kapaciteteve mbrojtëse, ndërsa theksoi se paralelisht mbetet i përkushtuar ndaj këtij dialogu të lehtësuar nga BE-ja me lidershipin aktual të Serbisë.

“Republika e Kosovës është një nga vendet më demokratike në rajonin tonë. Opozita jo vetëm që mund të fitojë zgjedhjet në vendin tonë, por edhe mund të shënojë fitore plebishitare—siç kemi dëshmuar më 14 shkurt 2021.

Që nga ardhja në pushtet e partisë sonë dhe pavarësisht efekteve negative nga pandemia globale COVID-19, ekonomia jonë ka arritur disa rezultate të dukshme….”, tha ndër të tjera Kurti.

Sipas tij, vitin e kaluar dhe këtë vit përsëri, World Justice Project renditi Kosovën të parën në Ballkan në Indeksin e tij për Sundimin e Ligjit.

“Ne e përmirësuam renditjen tonë me 17 vende, si në Indeksin Botëror të Lirisë së Shtypit (nga Reporters Without Borders) ashtu edhe në Indeksin e Perceptimit të Korrupsionit të Transparency International.

Me fjalë të tjera, progresi ynë ekonomik po ecën paralelisht me një proces të thellimit demokratik. Sot ne të gjithë jemi dëshmitarë se si telashet ekonomike po çojnë në rrëshqitje demokratike edhe në pjesë të Perëndimit të zhvilluar. Në këto rrethana, përvoja e fundit e Kosovës ofron një shembull pozitiv për të kundërtën dhe një fije shprese shumë të nevojshme.

Më lejoni ta mbyll duke thënë se, të dashur miq, sot bota ka nevojë për antifashistët jo më pak se një shekull më parë. Partitë socialiste dhe socialdemokrate duhet të bashkojnë njerëz të ndryshëm në mbarë globin për një qëllim të përbashkët: të shpëtojnë planetin nga rishfaqja e valës fashiste”, tha ndër të tjera kryeministri. /Telegrafi/