Izraeli do ta ndihmojë Ukrainën, por nuk do të dërgojë armët që po i kërkojnë ukrainasit

Izraeli do të ndihmojë Ukrainën të zhvillojë një sistem alarmi të mbrojtjes ajrore, njoftoi të mërkurën Ministri izraelit i Mbrojtjes, Benny Gantz, por vendi nuk planifikon të dorëzojë sisteme të armëve.

Gantz e bëri njoftimin gjatë një takimi me ambasadorët e Bashkimit Evropian në Izrael, raporton cnn.

“Ne u kemi dërguar një kërkesë ukrainasve për të ndarë informacione në lidhje me nevojat e tyre për alarmet e mbrojtjes ajrore. Sapo të marrim këtë informacion, ne do të jemi në gjendje të ndihmojmë në zhvillimin e një sistemi të paralajmërimit të hershëm civil që shpëton jetë”, tha Gantz.

Megjithatë ai shtoi se ndërsa “Izraeli mbështet dhe qëndron me Ukrainën, NATO-n dhe Perëndimin”, dhe do të vazhdojë të dërgojë pajisje humanitare dhe mbrojtëse, “Izraeli nuk do të dorëzojë sisteme armësh në Ukrainë për shkak të një sërë konsideratash operacionale”.

“Ne do të vazhdojmë të mbështesim Ukrainën brenda kufizimeve tona, siç kemi bërë në të kaluarën”, shtoi ai.

Komentet e Gantz vijnë disa ditë pasi Dmitry Medvedev, nënkryetari i Këshillit të Sigurimit të Rusisë dhe ish-presidenti rus, paralajmëroi Izraelin.

Paralajmërimi i Medvedev dukej se ishte në përgjigje të një postimi në Twitter të një ministri të qeverisë izraelite që thoshte se ishte koha që Izraeli të ofronte “ndihmë ushtarake” për Ukrainën pasi Rusia filloi të përdorte armë të prodhuara nga Irani. /Telegrafi/