“Ne dimë se si të bëjmë mrekulli”, zëvendës-presidenti i Barcelonës flet për rikthimin e Messit

Zëvendës-presidenti i Barcelonës, Eduard Romeu, ka insistuar se ata “dinë se si të bëjnë mrekulli” ndërsa diskutoi për një rikthim të mundshëm të Lionel Messit.

Zyrtari i lartë i Barcelonës është i bindur se Messi mund të joshet përsëri për një rikthim në Camp Nou nga Paris Saint-Germain nëse klubi arrin të gjejë një zgjidhje të qëndrueshme financiare.

Romeu ka përmendur edhe më parë mundësinë e ri-nënshkrimit të kapitenit argjentinas si lojtar i lirë kur kontrata e tij me PSG të skadojë në qershor 2021, ndërsa tani ka bërë përsëri tifozët të ëndërrojnë.

“Nëse klubi dëshiron (ta kthejë atë), ne do të fillojmë të punojmë në anën financiare të marrëveshjes”, ka thënë fillimisht Romeu në një konferencë për shtyp.

“Ne e dimë se si të bëjmë mrekulli. Dyert janë gjithmonë të hapura për Messin”, përfundoi njeriu i dytë në hierarkinë e Barcelonës.

Ndryshe, Messi duhej të largohej nga Barcelona në vitin 2021 pasi klubi katalunas nuk mund të përballonte të mbulonte pagat e tij mes vështirësive të tyre financiare.

Megjithatë, klubi që atëherë ka aktivizuar një numër levash ekonomike për të mbledhur fonde dhe mund të jetë në gjendje të përpiqet të rikthejë shtatë herë fituesin e Topit të Artë verën e ardhshme.

Sulmuesi, i cili nuk do të marrë një vendim përfundimtar për të ardhmen e tij deri në fund të sezonit, do të kthehet në aksion kundër Reims në Ligue 1 të dielën me PSG. /Telegrafi/