Shtëpia e Bardhë: Nuk ka indikacione se Rusia po përgatitet të përdorë armët bërthamore

Shtetet e Bashkuara kanë bërë të ditur se nuk ka indikacione që Rusia po përgatitet të përdorë armët bërthamore në luftën në Ukrainë, është thënë në një konferencë për media në Shtëpinë e Bardhë.

Vladimir Putin ka esklauar luftën shtatëmuajshe në Ukrainë, me mobilizimin ushtarak dhe paralajmërimin për përdorim të armëve bërthamore, transmeton Telegrafi.

“Çdo kërcënim për përdorim të armëve bërthamore e trajtojmë me seriozitetit, por dua të them… nuk kemi parë ndonjë arsye që të rivlerësojmë qëndrimin tonë bërthamor… sikurse nuk kemi parë indikacione që Rusia po përgatitet të përdorë armët bërthamore”, tha Jean-Pierre.

Kjo deklaratë vjen në kohën kur Kremlini njoftoi se nuk dëshiron të jetë pjesë e “retorikës bërthamore”, që sipas tyre “po shpërndahet nga Perëndimi”, pasi ishte raportuar se Rusia po përgatitet të demonstrojë gatishmërinë e saj për përdorimin e armëve bërthamore në luftën e Ukrainës.

Në anën tjetër në Moskë, nga Dmitry Medvedev e deri te Putini, kanë kërcënuar haptazi se do të përdorin armët bërthamore në Ukrainë.

E kjo e dëshmon edhe njëherë pretendimin e komunitetit të inteligjencës perëndimore, se lufta në Ukrainë nuk është duke shkuar sipas planit të Putinit, i cili e di se vendi i tij po pëson humbje të mëdha. /Telegrafi/