Qeveria miratoi projektligjet për Prokurorinë e Shtetit dhe Prokurorinë Speciale të Kosovës

Qeveria e Kosovës sot ka miratuar dy projektligje, atë për Prokurorinë e Shtetit dhe për Prokurorinë Speciale të Kosovës.

Kryeministri Albin Kurti, gjatë mbledhjes së qeverisë tha se fusha e drejtësisë është një nga prioritetet e qeverisjes.

Ndërkaq, ministrja e Drejtësisë, Albulena Haxhiu ka thënë se përmes këtij projektligji synojnë avancimin e mëtejshëm të legjislacionit lidhur me sistemin prokurorial, përcjell Telegrafi.

“Hartimi dhe finalizimi i këtij drafti i kanë paraprirë një varg takimesh dhe me institucionet tjera dhe me shoqërinë civile. Është bërë fuqizimi i kritereve për prokurorë të Shtetit dhe Prokurorë  të Prokurorive. Po ashtu janë qartësuar kompetencat e kryeprokurorit të shtetit mbi prokuroritë e tjera në nivel më të ulët. Është saktësuar kompetenca e kryeprokurorëve në prokuroritë që kanë përgjegjësi dhe të prokurorëve që punojnë aty…”, ka thënë Haxhiu.

Ndërsa, sa i përket Projektligjit të Prokurorisë Speciale, kryeministri Kurti u shpreh se Prokuroria Speciale është hallkë shumë e rëndësishme e sistemit prokurorial.

Ai tha se më këtë projektligj qartësohen përgjegjësit e këtij institucioni. /Telegrafi/