Nagelsmann i lumtur me nënshkrimin e Manes: Futbollist i shkëlqyer, mund të luaj në pesë pozita

Transferimi i Sadio Manes te Bayern Munich ka qenë njëri nga më të bujshmit këtë verë në tregun e transferimeve.

Sulmuesi senegalez u largua nga Liverpooli pas gjashtë viteve qëndrim në Anfield duke fituar gjithë trofetë e mundshëm me The Reds.

Kampioni në fuqi i Gjermanisë, Bayern Munich pagoi 40 milionë euro për afrimin e senegalezit i cili mund të luaj në tri pozitat e repartit ofensivë.

E shumë i emocionuar dhe i lumtur njëkohësisht është shprehur trajneri i Bayern Munich, Julian Nagelsmann për transferimin e sulmuesit senegalez.

“Jam shumë i emocionuar me transferimin e Manes. Që prej diskutimit të parë që patëm ai la një përshtypje se është një njeri shumë vetëmohues dhe kjo është diçka e jashtëzakonshme për një emër kaq të madh. Ai tha me goxha modesti se mund ta imagjinojë veten të luajë në çdo pozicion”.

“Është e rrallë ta përjetosh këtë në bisedën e parë, që një futbollist ta vendosë veten plotësisht në shërbim të klubit dhe trajnerit. Kjo e nxiti dëshirën tonë për ta bërë transferimin realitet përtej vështirësive edhe më të mëdha”, deklaroi Nagelsmann.

Tutje trajneri gjerman tha se Mane kishte një dëshirë të madhe për tu transferuar në Allianz Arena, derisa nuk kurseu lëvdatat për të duke thënë se mund të luaj në katër ose pesë pozita.

“Ne jemi Bayern Munich, ne kemi gjithnjë shansin për të bërë oferta për yje të mëdhenj. Ndonjëherë ne prekim limitet tona financiare, veçanërisht me djemtë që luajnë në Angli. Por këtë herë ishte ndryshe me Manen, sepse ai kishte një dëshirë të madhe për t’iu bashkuar projektit tonë, klubit dhe shokëve të skuadrës. Unë isha i kënaqur”.

“Këtë nuk mund ta themi ende me siguri. Duhet të presim dhe shohim se çfarë ndodh në tregun e transferimeve. Por Sadio është një futbollist, i cili mund të luajë lehtësisht në katër apo pesë pozicione dhe mund t’i këmbejë ato gjithashtu gjatë një ndeshjeje”, u shpreh Ngaelsmann.

Mane te Bayern Munich ka nënshkruar kontratë tri vjeçare me mundësi vazhdimi edhe për një tjetër. /Telegrafi/