Vrasja brenda familjes në Mitrovicën e Veriut, viktimat ishin goditur me thikë në trup – Prokuroria jep detaje

Një rast tragjik ndodhi sot në orët e mëngjesit në veri të Mitrovicës, ku një person vrau babanë dhe vëllanë, ndërsa i dyshuari me vendim të prokurorit të shtetit është ndaluar për 48 orë.

Prokuroria Themelore në Mitrovicës njoftoi se rasti ka ndodhur rreth orës 5:00 -5:30 të mëngjesit në banesë, në rrugën “Krajl Petri“ në Mitrovicë – Veri.

Në njoftim thuhet se i dyshuari M.B., për motive tani për tani të panjohura ka privuar nga jeta babanë e tij M.B., dhe vëllanë binjak U.B dhe me këtë i dyshuari ka kryer veprën penale “Vrasje e rëndë” nga neni 173 paragrafi 1 pika 1.3 e 1.11 të Kodit Penal të Republikës së Kosovës.

“Në bazë të hetimeve të para dyshohet se viktimat janë goditur në trup me thikë”, thuhet në njoftim.

Lexo po ashtu Policia arreston të dyshuarin për vrasje pas një konflikti familjar në veri të Mitrovicës

Në vendin e ngjarjes kanë dalur policia dhe prokurori kujdestar i Departamentit për Krime të Rënda i Prokurorisë Themelore në Mitrovicë, dhe me urdhër të prokurorit trupat e pajetë janë dërguar për autopsi në Institutin e Mjekësisë Ligjore në Prishtinë.

I dyshuari është arrestuar nga policia, dhe me vendim të prokurorit të shtetit është ndaluar për 48 orë, dhe ndaj të njëjtit brenda afatit ligjor do të paraqitet kërkesë për caktimin e masës së paraburgimit pranë Gjykatës Themelore në Mitrovicë. /Telegrafi/