SHBA me sanksione të reja ndaj individëve dhe kompanive ruse

Shtetet e Bashkuara zbuluan të mërkurën raundin e fundit të sanksioneve kundër Rusisë për agresionin në Ukrainë, këtë herë ishte në synim një bankë kryesore tregtare dhe “një rrjet global prej më shumë se 40 individësh dhe subjektesh të udhëhequr nga oligarku rus Konstantin Malofeev”.

Në një njoftim për shtyp, Departamenti Amerikan i Thesarit tha se po synonte gjithashtu “kompanitë që operojnë në industrinë e minimit të monedhave virtuale të Rusisë, që thuhet se është e treta më e madhe në botë”.

Kjo ishte hera e parë që sanksionohet “një kompani që merret me minimin e kriptovalutave”, raporton cnn.

Përveç kësaj, Departamenti i Shtetit po vendos kufizime vizash për 635 shtetas rusë, të cilët janë “të përfshirë në shtypjen e disidencës në Rusi dhe jashtë saj, të cilët kanë qenë të përfshirë në aktivitete që kërcënojnë integritetin territorial të Ukrainës dhe që kanë qenë të përfshirë në abuzime të të drejtave të njeriut”, sipas Thesarit të SHBA-së.

Tre zyrtarë rusë do të përballen gjithashtu me kufizime vizash “për përfshirje në shkelje të rënda të të drejtave të njeriut dhe për 17 individë përgjegjës për minimin e demokracisë në Bjellorusi”, shkruan në njoftimin e Thesarit të Shteteve të Bashkuara. /Telegrafi/