Deputetët mbajnë një minutë heshtje në nderim të Madeleine Albright

Ka nisur seanca e Kuvendit të Kuvendit, me rastin e shënimit të 23 vjetorit të ndërhyrjes së NATO-s në Kosovë.

Seanca ka nisur me një minutë heshtje, në nderim të ish sekretares së shtetit të SHBA-së, Madeleine Albright, transmeton Telegrafi.

Kryetari i Kuvendit, Glauk Konjufca, ka thënë se populli i Kosovës, do ta kujtojë gjithmonë sekretaren Albright.

Ndryshe, mikja e madhe e shqiptarëve, Madeleine Albright, ka vdekur në moshën 84-vjeçare.

Ajo vlerësohet se pati ndikim të madh për të bindur SHBA-në dhe botën për krimet serbe që po kryheshin në Kosovë nga ushtria dhe policia serbe.

Albright ishte gruaja e parë sekretare e shtetit të SHBA-së, e cila ndihmoi në drejtimin e politikës së jashtme perëndimore pas Luftës së Ftohtë.

Familja e saj ka bërë të ditur se Albright ka vdekur shkaku i kancerit dhe se në momentet e fundit ishte e rrethuar me anëtarët e familjes.

“Me zemër të thyer ju njoftojmë se Madeleine K. Albright, Sekretarja e 64-të e Shtetit dhe gruaja e parë që ka mbajtur atë postë, sot ka ndërruar jetë. Ajo kishte kancer”, shkruan në njoftimin e familjes në rrjetet sociale. /Telegrafi/