FFK aprovon kandidaturën e Agim Ademit për kryetar, refuzon atë të Gramoz Vokrrit

Federata e Futbollit e Kosovës (FFK) ka folur rreth aplikimeve të kandidatëve për kryetar të FFK-së, duke aprovuar kandidaturën e Agim Ademit dhe refuzuar atë të Gramoz Vokrrit.

FFK me datë 2 mars të këtij viti caktoi datën e zgjedhjeve për kryetar të FFK-së, zgjedhjet të cilat pritet të mbahen më 6 prill.

Kohën për aplikime e shfrytëzuan kryetari aktual Agim Ademi dhe djali i legjendës, Fadil Vokrri, Gramoz Vokrri.

Lexo po ashtu Zgjedhjet për kryetar në FFK: Kandidatët e paralajmëruar, si shkon proceduara dhe kush ka më shumë përkrahje

Megjithatë, FFK tani ka njoftuar në lidhje me kandidaturat, duke aprovuar njërën dhe refuzuar tjetrën.

Komisioni i FFK-së rreth aplikimeve ka pranuar kandidaturën e Agim Ademit dhe refuzuar atë të Gramoz Vokrrit, i cili sipas Komisionit të FFK-së për aplikimet e kandidaturave, ka pasur probleme me disa nga nënshkrimet e prezantuara.

Lexo po ashtu Gramoz Vokrri deponon nënshkrimet, pritet të jetë kandidat për kreun e FFK-së

Njoftimi pa ndërhyrje i FFK-së

Njoftim i Komisionit të FFK-së rreth aplikimeve të të kandiduarve për kryetar të FFK-së

Në vijim të njoftimit të datës 2 mars 2022, për caktimin e datës së mbajtjes së zgjedhjeve për kryetar të FFK-së, më datë 6 prill 2022, si dhe njoftimit të anëtarëve dhe delegatëve të Kuvendit të FFK-së për datën e mbajtjes së zgjedhjeve, ju informojmë se Komisioni për mbarëvajtjen e procesit deri në datën e mbledhjes së Kuvendit të Rregullt Zgjedhor, ku është paraparë edhe zgjedhja për kryetar të FFK-së, duke vepruar në përputhje me nenet 34 dhe 50 të Statutit të FFK-së dhe vendimin e Komitetit Ekzekutiv të datës 02.03.2022, pas verifikimit të aplikimeve të të kandiduarve për kryetar, verifikimit të nënshkrimeve të delegatëve ligjor që mbështesin të kandiduarit për t’u zgjedhur kryetar i FFK-së, si dhe verifikimin e procedurave të tjera statutare, në mbledhjen e mbajtur me datë 22.03.2022, mori vendim dhe i njoftoi aplikuesit që kanë kandiduar për kryetar të FFK-së.

Ky vendim i është dërguar Komitetit Ekzekutiv, i cili edhe e ka aprovuar këtë vendim më datë 22.03.2022. Ky vendim do t’i përcillet të gjithë delegatëve të Kuvendit të FFK-së, për procedim të mëtutjeshëm në ditën e mbajtjes së mbledhjes së rregullt të Kuvendit me datën 06 prill 2022.

Me këtë vendim janë informuar edhe aplikuesit për t’u kandiduar për kryetar të FFK-së, ku për çfarëdo paqartësie ose mospajtimi janë udhëzuar me këshillën juridike.

Po ashtu, me këtë vendim do të informohen organet përkatëse të UEFA-së dhe FIFA-së, të cilët monitorojnë punën e Federatave anëtare, si dhe gjithashtu do të informohet MKRS-ja.

Për detajet rreth këtij vendimi dhe arsyetimin e tij,  ju lutem gjeni më poshtë linkun me vendimin e publikuar.

LINKU

/Telegrafi/