Pioli flet pas fitores ndaj Lazios: Triumfi në derbi na ka dhënë energji të madhe

Milani ka arritur të sigurojë plasmanin në gjysmëfinale të Kupës së Italisë, pas fitores së thellë në çerekfinale ndaj Lazios.

Kuqezinjtë triumfuan me rezultat të thellë 4-0, ku golat u shënuan nga Rafael Leao, Franck Kessie dhe dy të tjerë nga Olivier Giroud.

Trajneri i Milanit, Stefano Pioli ka thënë se fitorja në derbi me Interin ka ndikuar për së miri, pasi tani kanë më shumë energji.

“E shfrytëzuam në maksimumin fitoren e derbit për t’i dhënë vetes më shumë energji, besim dhe bindje. E gjithë atmosfera është pozitive, ishim të përqendruar dhe kontrolluam lojën gjatë 90 minutave”, tha Pioli.

Tutje trajneri italian ka folur edhe për ndeshjet gjysmëfinale, ku përballë do ta kenë rivalin lokal Interin.

Si kuqezinjtë ashtu edhe zikaltërtit duan ta fitojnë këtë garë dhe Pioli thotë se do ta japin maksimumin.

“Këto janë gjithmonë ndeshje speciale për t’u përgatitur dhe shumë stimuluese. Kupa e Italisë është një garë që të dyja klubet duan ta fitojnë, kështu që do të përpiqemi të japim maksimumin ndaj kundërshtarëve që e dimë që janë shumë të fortë”, u shpreh trajneri italian. /Telegrafi/