Greqia merr gjashtë aeroplanë luftarakë francezë si pjesë e ‘pakos për avancim ushtarak’ prej 11.5 miliardë eurosh

Greqia shfaqi aftësitë e saj mbrojtëse të fituara rishtazi të martën, ndërsa gjashtë aeroplanë luftarakë Rafale, të ardhur së fundmi nga Franca, fluturuan mbi Akropol.

Sipas mediave të huaja, përcjell Telegrafi, aeroplanët “gjëmuan” mbi monumentin simbolik gjatë rrugës për në bazën ajrore Tanagra, duke nënvizuar vendimin e qeverisë greke për të vazhduar përpara me një zhvillim ushtarak mes tensioneve me Turqinë.

“Këta aeroplanë të rinj luftarakë e bëjnë forcën tonë ajrore një nga më të fortat në Evropë dhe Mesdhe”, ka thënë kryeministri Kyriakos Mitsotakis, duke marrë pjesë në një ceremoni pritjeje në bazën ajrore në veri të Athinës.

Ndërsa parandalimi ishte qëllimi përfundimtar, blerjet do të forconin “fleksibilitetin e diplomacisë sonë kombëtare”, tha ai.

Administrata e qendrës së djathtë ka njoftuar një rritje shtatëfish të shpenzimeve të mbrojtjes vitin e kaluar.

Pilotët luftarakë grekë detyrohen shpesh të përfshihen në “përleshje të rreme” në hapësirën ajrore të Egjeut të kontestuar nga Turqia me Mitsotakis që e përshkruan nevojën për të përmirësuar forcën ajrore si urgjente.

Përveç 24 Rafales, si të vjetra ashtu edhe të reja, Athina do të bëjë një stok të anijeve luftarake, helikopterëve dhe 84 aeroplanëve F-16 të modernizuar të prodhuar nga SHBA si pjesë e një programi prokurimi që do të përfshijë blerjen e raketave ajër-ajër Meteor.

Sipas ekspertëve të mbrojtjes në Uashington dhe Athinë, po diskutohet gjithashtu blerja e aeroplanëve luftarakë F-35 – i parë si një ndërrues i lojës nga forcat e armatosura helene.

Blerja e Rafales-it të prodhimit francez vjen në kohën e një avancimi ushtarak që parashikohet t’i kushtojë Greqisë 11.5 miliardë euro deri në vitin 2025 dhe nuk është pa polemika.

Partia opozitare e majtë Syriza i ka quajtur shpenzimet “të tepërta” në një kohë kur pandemia dhe kriza e kostos së jetesës rëndojnë gjithnjë e më shumë Greqinë.

Ndryshe, tensionet mbi pretendimet rivale për rezervat e gazit në det të hapur në Egje dhe Mesdheun Lindor e sollën Greqinë dhe Turqinë në prag të luftës në vitin 2020.

Pamja e aeroplanëve luftarakë francezë në qiejt e Greqisë erdhi vetëm katër muaj pasi Mitsotakis nënshkroi një marrëveshje ushtarake historike, shumë miliarda euro me presidentin francez, Emmanuel Macron, në Paris.

Sipas marrëveshjes, Franca do t’i dorëzojë Greqisë tre fregata të teknologjisë së fundit Belharra deri në vitin 2025.

Ndërkohë përkeqësimit të lidhjeve të Francës me Turqinë i është bërë jehonë nga një përmirësim i marrëdhënieve dypalëshe midis Athinës dhe Parisit, të çimentuar nga interesat e përbashkëta të kombeve në Mesdhe. /Telegrafi/