300 qeli për 210 milionë euro, dokumenti i plotë i marrëveshjes mes Kosovës dhe Danimarkës

Kosova dhe Danimarka dje kanë nënshkruar marrëveshjen e bashkëpunimit për dhënien me qira të Qendrës së Paraburgimit në Gjilan për 10 vite për shtetin e Danimarkës.

Në deklaratën e përbashkët e cila u nënshkrua nga ministrja e Drejtësisë, Albulena Haxhiu dhe ministri i Drejtësisë së Danimarkës, Nick Haekkerup, thuhet se “ne konfirmojmë bashkëpunimin dhe marrëdhënien e ngushtë dhe të gjatë midis Danimarkës dhe Kosovës. Danimarka ka pasur një prani të konsiderueshme në Kosovë në të kaluarën dhe ka kontribuar në paqe-ruajtjen dhe zhvillimin demokratik të Kosovës. Ne pohojmë afërsinë historike, lidhjet midis dy vendeve tona dhe ne ndajmë një dëshirë për të forcuar edhe më tej marrëdhëniet tona bilaterale”.

Më tej në deklaratë thuhet se “ne jemi të përkushtuar të ndajmë vlerat e përbashkëta themelore dhe jemi të vendosur që së bashku të vazhdojmë më tej në forcimin e shtetit ligjor, demokracisë dhe të drejtave të njeriut”, shkruan Telegrafi.

Në deklaratën e përbashkët mes tjerash thuhet se “jemi të vetëdijshëm për zhvillimet e rëndësishme pozitive në veçanti në shërbimin korrektues në Kosovë, dhe ne pajtohemi që duke intensifikuar bashkëpunimin mes dy vendeve tona në këtë fushë, Kosova do të ketë mundësinë që të forcojë edhe më tej sistemin e saj korrektues”.

Në marrëveshjen e nënshkruar mes Kosovës dhe Danimarkës thuhet se Qeveria e Kosovës do t’i ofroj Mbretërisë së Danimarkës, kapacitetet e burgut, gjegjësisht institucionit korrektues që gjendet në Gjilan për 300 të burgosur, për qëllimin e ekzekutimit të dënimeve daneze dhe do të bëjë rregullimet e nevojshme për çdo lehtësi për të siguruar që ai është në përputhje me ligjet dhe standardet daneze.

“Qeveria e Danimarkës synon të paguajë një tarifë vjetore për përdorimin e një burgu prej 15,000,000 euro në varësi të numrit të të burgosurve për të cilin objekti është bërë i përshtatshëm në përputhje me rregullat dhe rregulloret daneze, me një tarifë të reduktuar për 12 muajt e parë të vitit përdorimi i burgut si periudhë tranzicioni. Qeveria e Danimarkës synon gjithashtu të paguaj një tarifë fillestare prej 5,000,000 euro për të mbuluar periudhën e tranzicionit derisa burgu të jetë përfunduar dhe plotësuar me personel. Këto tarifa do të mbulojnë të gjitha kostot që lidhen me një marrëveshje të tillë”, thuhet në marrëveshjen mes dy shteteve, shkruan Telegrafi.

Ministrja e Drejtësisë, Albulena Haxhiu tha dje se negocimi i kësaj marrëveshje ka nisur një vit më herët nga ish-qeveria, për çka tha se pret që opozita e tanishme do ta përkrahë këtë marrëveshje kur të shkoj në Kuvend për ratifikim.

Ajo tha se kur të vendosen të burgosurit në Kosovë, do të vlejnë ligjet e shtetit të Danimarkës.

Lexo po ashtu Kosova i jep Danimarkës në shfrytëzim 300 qeli burgu

Ndërsa ministri i Drejtësisë së Danimarkës, Nick Haekkerup tha se Danimarka ka kërkuar ndihmë edhe nga vende tjera për sistemimin e të burgosurve por Kosova e para ka ofruar ndihmë.

Hakkerup ka thënë se qendrat e paraburgimit do të menaxhohen sipas ligjeve të Danimarkës.

“Menaxhimi do të jetë nën lidershipin e autoriteteve të Danimarkës, por do të ketë trajnim edhe për stafin vendas. Danimarka do të respektojë të gjitha ligjet sa i përket sistemimit dhe trajtimit të burgosurve”, tha ndër të tjera Nick Hakkerup. /Telegrafi/

Dokumenti i plotë i marrëveshjes Kosovë-Danimarkë: