Masakra në Reçak, ministri i Vuçiqit e quan ‘rrenë’ dhe falsifikim të shqiptarëve dhe NATO-s

Masakra në fshatin Reçak të Shtimes është ndër masakrat më mizore që kanë kryer forcat policore, ushtarake dhe paramilitare të Serbisë ndaj popullatës civile gjatë luftës së fundit në Kosovë. 

Institucionet serbe në krye me presidentin e saj Aleksandar Vuçiq që ishte ministër në kohën e qeverisë së udhëhequr nga Sllobodan Millosheviq, ideator i luftërave në Ballkan edhe sot e mohojnë krimin që kanë bërë në Kosovë, ashtu siç nuk e pranojnë që kishte gjenocid gjatë luftës në Bosnje e Hercegovinë.

Së fundi, ministri i Punëve të Brendshme të Serbisë, Aleksandar Vullin i cili njihet me deklarata anti-shqiptare ka thënë se masakra e Reçakut është ‘gënjeshtër’. Ai ka treguar se Serbia po bënë film dokumentar për këtë dhe këto deklarata i ka bërë gjatë vizitës në afërsi të Nishit ku shteti serb po xhiron këtë film dokumentar për ngjarjet në Reçak. Sipas tij, kjo ngjarje është e trilluar.

Lexo po ashtu BE: Nuk ka vend për ta mohuar apo nënvlerësuar Masakrën e Reçakut

“Agresioni i NATO-s ka filluar pas gënjeshtrave në Reçak. Në atë kohë nuk kemi qenë mjaftueshëm të mençur dhe të zgjuar që t’i tregojmë botës që kjo ishte ‘gënjeshtër’. Detyrë e kësaj gjenerate është që t’i tregoj botës që na kanë bombarduar dhe kanë bërë krime mbi ne duke u thirr në gënjeshtra”, ka deklaruar Vulin, citojnë mediat në Serbi, shkruan Telegrafi.

Vullin nuk është hera e parë që haptas akuzon NATO-n dhe shqiptarët për këtë. Ai madje shpesh në diskursin publik përdorë gjuhë denigruese për shqiptarët në Ballkan.

Pavarësisht se çfarë thotë Vullin dhe qeveria e tij, bashkësia ndërkombëtare ka sulmuar forcat ushtarake serbe për masakrat që kanë bërë gjatë luftës së fundit në Reçak dhe në vende të tjera të vendit.

Ndryshe, më 15 janar 2021, janë bërë 22 vjet që kur forcat policore dhe ushtarake serbe kryen njërën nga masakrat më të dhimbshme kundër njerëzimit në Reçak.

Më 15 janar 1999, në këtë ditë të kobshme, në Reçak u vranë e u masakruan 45 shqiptarë të paarmatosur.

Policia dhe ushtria serbe në Kosovë kanë kryer masakra të shumta gjatë viteve 1998 dhe 1999, por Masakra e Reçakut u dëshmua nga misioni i OSBE-së në Kosovë, që ndikoi në ndërhyrjen e NATO-s ndaj caqeve serbe.

Pasi e pa me sytë e tij këtë skenë, shefi i misionit të OSBE-së, William Walker, kishte alarmuar se në Kosovë po ndodh krim kundër njerëzimit, gjë që shtyu bashkësinë ndërkombëtare të ndërmarrë misionin ushtarak, pas të cilit forcat serbe u tërhoqën nga Kosova. /Telegrafi/