Maqedoni, libra digjital dhe mungesë të karrigeve

Nga ky vit shkollor do të fillojë zbatimi i Konceptit të ri të arsimit fillor. Nxënësit e klasave të katërta dhe të nënta do të fillojnë të mësojnë me libra digjital. Ndërsa në pesë vitet e ardhshme, të gjithë nxënësit e shkollave fillore do të mësojnë përmes librave digjital. Biljana Stojanovska, autore e librit digjital ka deklaruar se krijimi i materialit mësimor për klasën e katërt në lëndën e shkencave natyrore ka qenë sfidë në vete. Sipas saj, ndryshimi i Konceptit dhe materialit ka sjellë risi dhe vështirësi në përgatitjen e materialit mësimor sepse ka ndryshuar shumë nga materiali i vitit të kaluar.

“Në përgatitjen e materialeve kishim qëllim zhvillimin e të menduarit kritik, kreativitetit dhe proaktivitetit te nxënësit. Kjo është arsyeja se pse materiali ka përmbajtje argëtuese, eksperimente, kërkime dhe ilustrime interesante. Duke përdorur këtë tekst shkollor, nxënësit do të zhvillojnë aftësitë e tyre për mendim kritik, komunikim, krijim dhe bashkëpunim”, deklaroi Stojanovska.

Megjithatë, profesorët, ekspertët dhe njohësit e çështjeve arsimore, që nga paralajmërimi i Ministrisë së Arsimit dhe Shkencës (MASH), kanë kritikuar dhe kundërshtuar librat digjital. Sipas tyre, kjo nuk është metodë e mirë për vendin tonë dhe se nuk jemi ende të përgatitur. Samet Jahiu, kryetar i Lidhjes së Arsimtareve Shqiptar Kumanovë-Likovë, për gazetën KOHA, ka deklaruar se në përgjithësi në numrin më të madh shkollat në këtë rajon ju mungojnë kushtet elementare për zhvillimin e procesit edukativo-arsimor.

“Derisa ne kemi mungesë të kushteve elementare, autoritetet shtetërore po mendojnë se si ta modernizojnë arsimin me libra digjital e ditarë elektronik dhe jo të na i plotësojnë kushtet elementare në shkollat tona. Disa nga shkollat tona kanë mungesë të bankave dhe karrigeve, ndërsa MASH po tenton që ta digjitalizoj procesin edukativo-arsimor. Deri më tani na i kanë sjellë nga dy ‘smart tabela’ në shkollat e fshatrave dhe nga tre-katër në shkollat e qyteteve, të cilat nuk janë të mjaftueshme për procesin arsimor të cilën ka për qëllim MASH ta bëjë, sepse në çdo shkollë ne kemi gati nga 16 paralele”, shprehet Sameti.

Ai shtoi gjithashtu se për nxënësit kanë sjellë vetëm nga 10 tableta në çdo shkollë, derisa vlerëson se këto nuk janë aspak të mjaftueshme për plotësimin e nevojave të nxënëseve në këtë rajon. Në anën tjetër, MASH-i lavdërohet se janë duke modernizuar arsimin, por fakti në terren qëndron ndryshe. Materialet mësimore, sipas ministres Milla Carovska, janë mjet tjetër alternativ me të cilat nxënësit do të zotërojnë dhe do të përfitojnë aftësi të reja dhe të mjaftueshme nga materiali mësimor.

Ajo gjithashtu kanë njoftuar se për t’i përfshirë të gjithë nxënësit në arsimin cilësor dhe modern, kanë blerë 10.000 tableta të cilat janë destinuar për nxënësit në disa shkolla të vendit. Ndryshe, risi në përgatitjen e librave të rinj digjital ka qenë se materiali mësimor nuk është përgatitur përmes shërbimit pedagogjik, siç ishte deri më tani, por i gjithë procesi për krijimin e materialeve dhe teksteve shkollore u zhvillua përmes Byrosë për Zhvillimin e Arsimit. (koha.mk)