Shtrëngohen masat sërish në Holandë – mbyllen klubet e natës, s’ka koncerte

Kryeministri holandez, Mark Rutte njoftoi të premten një seri masash për të frenuar rritjen e rasteve të coronavirusit në vend, përfshirë mbylljen e klubeve të natës.

Numri i njerëzve të infektuar u rrit shtatë herë në shtatë ditë dhe kishte 7,000 raste të reja me COVID-19, tha Rute, duke detyruar qeverinë të heqë dorë nga masat lehtësuese.

“Reja e zezë ka lënë në hije diellin. Aktualisht, numri i të infektuarve është në rritje, kryesisht për shkak të variantit shumë ngjitës delta”, tha ai në një konferencë shtypi, raporton nltimes.

“Nëse nuk bëjmë diçka, ritmi i infeksionit do të rritet edhe më shumë. Është e qartë se përhapja e shpejtë e virusit duhet të ndalet në fillim”, tha kryeministri.

Qeveria ka vendosur të mbyll të gjitha klubet e natës dhe restorantet do të jenë të hapura deri në mesnatë.

Të gjithë mysafirët e restoranteve dhe kafeneve duhet të respektojnë distancën prej 1.5 metrash, specifikoi kryeministri, duke shtuar se nuk do të mbahen koncerte apo ahengje.

Masat do të hyjnë në fuqi të shtunën (sot) dhe do të zgjasin të paktën deri më 13 gusht. /Telegrafi/