Kabina e teleferikut ishte “ndrydhur e tëra”: Detaje dhe pamje të reja rreth aksidentit me 13 të vdekur në Itali

Trembëdhjetë njerëz kanë gjetur vdekjen dhe dy fëmijë janë lënduar rëndë pasi një kabinë teleferiku ra në një mal pranë Liqenit Maggiore në Italinë Veriore të dielën.

Sipas medieve të huaja, përcjell Telegrafi, aksidenti ndodhi në një shërbim që transportonte pasagjerë nga qyteti turistik i Stresa deri në malin aty pranë Mottarone në rajonin e Piemonte.

Imazhet nga skena tregojnë rrënojat e shtrira në një zonë të pjerrët me pyje.

Zyrtarët thanë se dy të mbijetuar, të moshës pesë dhe nëntë vjeç, u dërguan me helikopter në një spital të Torinos.

Zyrtarët e shpëtimit alpin konfirmuan në një cicërimë në Twitter të dielën në mbrëmje se numri i fundit i të përfshirëve ishte 13 të vdekur dhe dy të plagosur, pasi numri i të vdekurve u rrit në mënyrë të vazhdueshme në orët pas aksidentit ndërsa rrënojat u kontrolluan.

Si ndodhi aksidenti?

Shkaku i incidentit mbetet i paqartë, por raportet lokale sugjerojnë që kablloja që mbante kabinën mund të ketë dështuar rreth 300 metra nga maja e malit.

Shërbimet e urgjencës thonë se ata u njoftuan menjëherë pas orës 12:00 me kohën lokale të dielën.

Lexo po ashtu Pamje nga vendi i aksidentit të teleferikut në Itali - dëshmitarët rrëfejnë ngjarjen që la të paktën tetë të vdekur

Zyrtarët e policisë dhe zjarrfikësve ishin midis atyre që u përgjigjën, me ekipet e shpëtimit që përballen me një vend përplasjeje në terren të pjerrët dhe të vështirë.

Walter Milan, një zëdhënës i shpëtimit alpin, i tha rrjetit televiziv RaiNews24 se kabina e teleferikut ishte “ndrydhur e tëra” pasi kishte rënë nga një lartësi e madhe.

Kryeministri italian Mario Draghi e përshkroi rrëzimin si një “aksident tragjik” dhe tha se ai po merrte azhurnime nga ministri i infrastrukturës dhe transportit, si dhe zyrtarë lokalë.

Çfarë dimë për teleferikun?

Uebfaqja për shërbimin Stresa-Alpine-Mottarone tha se zakonisht duhen 20 minuta për të transportuar pasagjerë 1,491m mbi nivelin e detit.

Teleferiku fillimisht u hap në 1970 dhe u mbyll për mirëmbajtje midis 2014 dhe 2016.

Mottarone ndodhet midis liqenit Maggiore dhe liqenit Orta, duke ofruar pamje piktoreske të rajonit për turistët.

Çdo kabinë teleferiku zakonisht mund të mbajë rreth 40 pasagjerë. Shërbimi ishte rihapur kohët e fundit pas heqjes së kufizimeve të coronavirusit. /Telegrafi/