Vitia: Jemi në bisedime të drejtpërdrejta me të gjitha kompanitë prodhuese për furnizim me vaksina

Ministri i Shëndetësisë, Arben Vitia gjatë raportimit të tij në seancën e Kuvendit të Kosovës ka thënë se janë në bisedime të drejtpërdrejta me të gjitha kompanitë prodhuese.

Për shkak të konfidencialitetit, Vitia tha se nuk mund të tregojë më shumë detaje, por mund të konfirmojë se janë në rrugë të mbarë për të siguruar vaksinat.

“Jemi në bisedime të drejtpërdrejta me të gjitha kompanitë prodhuese dhe me disa nga to jemi në rrugë të mbarë që të sigurojmë vaksina, por për shkak të konfidencialitetit nuk mundem për momentin të bëj të ditura detaje”, tha Vitia.

Ministri Vitia u shpreh po ashtu se numri i testimeve është rritur për 13.64 për qind, në krahasim me testimet e bëra për 20 ditët e fundit para se të merrte postin e ministrit.

Ai theksoi se testimet po vazhdojnë në bazë të kritereve të vendosura nga Instituti Kombëtar i Shëndetësisë Publike të Kosovës.

“Testimet në IKSHPK dhe laboratorët private, vazhdojnë sipas indikacioneve epidemiologjike dhe kritereve të reja të definuara nga ky institut. Nëse krahasojmë 28 ditët e kabinetit të ri të MSH, nga data 23 mars deri më 19 prill janë testuar 111 mijë e 536  raste. Kurse në 20 ditët paraprake nga data 23  shkurt deri më 22 mars 2021 janë testuar 98 mijë e 140 raste, do më thënë  13.64 % është testuar më shumë në këtë periudhën e fundit”, theksoi Vitia.

Sipas tij, masat anti-COVID do të vazhdojnë të përditësohen çdo dy javë, ndërkaq u shpreh se ka një ulje të rasteve të reja me coronaviorus prej 22 për qind, pas masave të fundit.

“Masat do të përditësohen çdo dy javë varësisht nga situate epidemiologjike në terren. Raportimet e fundit flasin kemi ulje të rasteve të të infektuarve dhe të të hospitalizuarve. Krahas uljes së numrit të rasteve të reja dhe të të hospitalizuarve, kemi edhe rënie të rasteve të vdekjes, pra nga mbi 10 raste, në më pak se 10 raste për dita ditë radhazi. Kapacitetet tona spitalore janë liruar për 22 për qind. Raporti i fundit, ai i datës 22 prill, flet edhe për raste të uljes së rasteve pozitive për 22 për qind. Tashmë vërehet qartë edhe rritja e numrit të të shëruarve”, u shpreh Vitia gjatë raportimit të tij. /Telegrafi/