Mbi 80 për qind të respondentëve në pyetësorin e Telegrafit mendojnë se vota e LDK-së pro Vjosa Osmanit do ta përmirësonte imazhin e partisë

Deputetët e Lidhjes Demokratike të Kosovës do të marrin pjesë në seancën ku do të votohet për zgjedhjen e Presidentit të Kosovës.

Ndërkaq, mbi 80 për qind të respondentëve të cilët kanë marrë pjesë në pyetësorin e Telegrafit, mendojnë se vota e LDK-së pro Vjosa Osmanit për presidente do ta ngriste imazhin e Lidhjes Demokratike të Kosovës.

Në këtë pyetësor ku brenda pak orëve morën pjesë 1 mijë e 500 persona, 83 për qind e tyre mendojnë se përkrahja e LDK-së për Vjosa Osmanin do ta përmirësonte imazhin e kësaj partie, teksa pjesa tjetër mendojnë që ky qëndrim nuk do ta ndihmojë përmirësimin e imazhit të partisë.

Kryetari i LDK-së, Lumir Abdixhiku ka deklaruar para medieve, pas mbledhjes që pati me deputetët e partisë së tij se i ka njoftuar ata me vendimin që kanë marrë në Kryesinë  e partisë, që LDK nuk do të bëjë obstruksione në zgjedhjen e presidentit të vendit dhe LDK si gjithherë do të ushtrojë detyrimin kushtetues e të marr pjesë në votim për presidentin e vendit, pa paragjykuar votimin e deputetëve.

Abdixhiku pas takimit me deputetët e partisë të tij tha se ky është vendimi i Kryesisë së partisë dhe këtë vendim ua komunikuar deputetëve.

“Pres që secili deputet të respektojë vullnetin kolektiv të shumicës dhe të mos pengojë kursin e ri të LDK-së drejt rikthimit tonë origjinal. Pres të sillen si institucionalist dhe të kapërcejnë veten dhe çfarëdo hidhërimi që mund ta kenë”, tha kryetari i LDK-së. /Telegrafi/