Abdixhiku: LDK do të marrë pjesë në votimin për presidentin e vendit

Kryetari i Lidhjes Demokratike të Kosovës, Lumir Abdixhiku tha sot se pas një diskutimi të hapur kanë marrë vendim që LDK nuk do të bëjë obstruksione në zgjedhjen e presidentit të vendit dhe LDK si gjithherë do të ushtrojë detyrimin kushtetues e të marr pjesë në votim për presidentin e vendit, pa paragjykuar votimin e deputetëve.

Abdixhiku pas takimit me deputetët e partisë të tij tha se ky është vendimi i Kryesisë së partisë dhe këtë vendim ua komunikuar deputetëve.

“Pres që secili deputet të respektojë vullnetin kolektiv të shumicës dhe të mos pengojë kursin e ri të LDK-së drejt rikthimit tonë origjinal. Pres të sillen si institucionalist dhe të kapërcejnë veten dhe çfarëdo hidhërimi që mund ta kenë”, tha kryetari i LDK-së.

Ai më tej tha se vendimi i Kryesisë së LDK dhe i tij është që fillimisht vendit t’i jepet një proces normal parlamentar.

“Vota përfaqëson vullnetin qytetar dhe çdo hap për të penguar këtë vullnet është veçse kundërshti ndaj njerëzve tanë, ndaj qytetarëve të këtij vendi. Vendimi i Kryesisë së LDK-së determinon edhe fatin tonë politik të vendit për një periudhë pesëvjeçare”, tha Abdixhiku.

Ai tha se presin që presidenti i vendit të jetë president i të gjithëve, të jetë bashkues e jo ndarës, garantues i Kushtetutës, të jetë njëmend president e jo i nënshtruar i pushtetit. /Telegrafi/