Pas përhapjes së variantit të ri të COVID-19, Gjermania paralajmëron mbylljen e kufijve me fqinjët

Gjermanisë mbase do t’i duhet të mbyllë kufijtë me vendet fqinje, nëse ato nuk marrin masa për të frenuar përhapjen e Coronavirusit.

Kështu ka paralajmëruar të enjten shefi i stafit të kancelares Angela Merkel, Helge Braun.

Braun tha për televizionin ARD se është e rëndësishme të vendoset nën kontroll situata në mënyrë që vendet të mbronin veten nga varianti i ri i Coronavirusit, shumë më i transmetueshëm.

“Rreziku është që kur numri i të infektuarve në një vend të rritet, ky mutacion i virusit bëhet dominues dhe atëherë infeksioni nuk mund të kontrollohet më”, tha Braun, duke shtuar se rregullat më të rrepta të hyrjes në Gjermani janë të pashmangshme, përcjell REL.

Lexo po ashtu Si po reagon ekonomia gjermane pas vendimit për shtrëngimin e masave nga pandemia COVID-19?

Që nga muaji nëntor 2020, Gjermania ka vendosur masa të ashpra të izolimit duke mbyllur restorantet dhe qendrat e sportit, ndërsa prej mesit të dhjetorit edhe shkollat dhe shumicën e dyqaneve.

Varianti i ri i Coronavirusit fillimisht është identifikuar në Britani të Madhe dhe Afrikën Jugore.

Ekspertët kanë thënë se ai është shumë më ngjitës se varianti i parë mirëpo përgjithësisht ka simptoma të njëjta dhe nuk është më i rrezikshëm. /Telegrafi/