Për herë të parë hapen Zyrat e Këshillit Kombëtar Shqiptar në Medvegjë

Ministri në detyrë për Evropën dhe Punët e Jashtme, Gent Cakaj, bëri me dije se sot, me mbështetjen e drejtpërdrejtë politike, financiare dhe institucionale të Shqipërisë, për herë të parë është hapur zyra e Këshillit Kombëtar Shqiptar në Medvegjë.

Kjo zyrë, siç thekson Cakaj do të luajë një rol shumë të rëndësishëm në mbrojtjen dhe lartësimin e të drejtave themelore të shqiptarëve në Medvegjë.

Më tej Cakaj shprehet se hapja e kësaj zyre ka qenë detyrim kombëtar i kamotshëm i Shqipërisë, por tani është edhe imponim i disa rrethanave politike: procesi i fshirjes së adresave të shqiptarëve ka zvogëluar dukshëm peshën politike të faktorit shqiptar në Medvegjë.

“Kjo zyrë, në bashkërendim të plotë me Shqipërinë, duhet të punojë fort në kundërshtimin e politikave të fshirjes krejtësisht të qëllimshme të adresave të shqiptarëve”, tha Cakaj.

Gjithashtu, Cakaj pohon se Medvegja është pjesë e patjetërsueshme e Luginës së Preshevës dhe puna për mbështetjen e faktorit shqiptar në këtë qytet do të vazhdojë me përkushtim të plotë.

“Shumë shpejt do të fillojmë edhe me programin e plotësimit të shkollave me literaturë shqipe dhe trajnimit të mësuesve shqiptarë në Medvegjë”, u shpreh Cakaj.

Ai përfundoi reagimin e tij, duke shprehur se mbështetja politike dhe institucionale për të gjithë shqiptarët në rajon është dhe do të jetë e vazhdueshme.