Raporti javor i ISHP: Ulet numri i rasteve të reja me coronavirus dhe të vdekurve dhe rritet numri i të shëruarve 

Ministria e Shëndetësisë njoftoi se në raportin javor të Institutit për Shëndet Publik (ISHP) për periudhë 29 qershor deri më 5 korrik, vërehet ulje e numrit të të infektuarve dhe vdekje, si dhe rritje të numrit të personave të shëruar në krahasim me javën e kaluar.

Gjatë kësaj periudhe janë bërë 8.422 testime, dhe janë regjistruar 917 raste të reja me coronavirus, që është për 186 raste më pak se java e kaluar, njofton Telegrafi Maqedoni. Në tre javët e fundit numri rasteve të reja në javë shënon rënie, si në përqindje ashtu edhe në raste pozitive nga të testuarit. Në periudhën 29 qershor deri më 5 korrik, kjo përqindje është 10.9%.

Raste me coronavirus janë regjistruar në 25 qytete, nga ku më së shumti ka Shkupi me 45.9% dhe Tetova me 10.3%. Në 17 qytete të vendit, numri rasteve të reja me coronavirus është nën 20.

Sipas njoftimit, nga rastet e reja të kësaj periudhe më së shumti janë persona mbi 60 vjet apo 22.9%, persona prej moshës 50-59 vjet apo 19.8%. Ka një rënie në krahasim me periudhën e kaluar te personat mes 40-49 vjet dhe rritje të përqindjes te personat mes 30-39 vjet dhe 20-29 vjet. Më pak të infektuar ka te fëmijë edhe atë te fëmijët prej 0-9 vjet 3.1% dhe nga 10-19 vjet është 4.1% nga numri i përgjithshëm i të infektuarve.

Prej rasteve të reja të kësaj periudhe (29 qershor – 5 korrik), janë hopsitalizuar 113 persona apo 13.4% që është një ulje prej 4% në krahasim me javën e kaluar. Në këtë periudhë janë regjistruar 465 raste, që është 11 më pak se java e kaluar. Pjesa më e madhe e rasteve të vdekjes janë persona mbi 60 vjet, apo 67.4%. Te 38 rastet e vdekjes (82.6%) ka pasur prani të sëmundjeve tjera të mëhershme.

Ministria e Shëndetësisë njofton se gjatë kësaj periudhe 613 persona janë shëruar, që është për 166 persona më shumë se java e kaluar (21-28 qershor). Kjo, shtojnë nga MSH, gjithashtu është e rëndësishme dhe indikator pozitiv që ndikon në uljen e rasteve aktive./Telegrafi/