Vidhet vetura në pikë të ditës në Kodrën e Trimave, gjithçka filmohet nga kamerat

Në lagjen Kodra e Trimave në Prishtinë sot rreth orës 15:00 është vjedhur një veturë, të cilën pronari e kishte parkuar pranë trotuarit, e rasti është filmuar nga kamerat e sigurisë.

Policia e Kosovës e ka konfirmuar për Telegrafin rastin e vjedhjes së  veturës në Lagjen Kodra e Trimave në kryeqytet.

“Me datë 10.06.2020 rreth orës 15:10 në Rr.Fahri Fazliu në Prishtinë është raportuar një rast “Vjedhje e Automjetit”. Dyshohet se automjeti i ankuesit me targa vendore ka qenë i parkuar për kohë të shkurtër në një parking të një lokali dhe derisa ankuesi ka kryer shërbimin në lokal, personi/a i dyshuar ka hyrë në automjetin e tij dhe ka ikur në drejtim të panjohur”, ka thënë zëdhënësi i Policisë, Daut Hoxha, për Telegrafin.

Sipas Hoxhës, njësitet policore kanë dalë në vendin e ngjarjes dhe po i zhvillojnë hetimet në drejtim të zbardhjes së rastit.

“Policia e Kosovës ka dalë në lokacion dhe njësitet kompetente janë duke kryer hetime lidhur me rastin”, ka thënë Hoxha.

I tërë rasti është filmuar nga kamerat e sigurisë, ku shihet momenti kur pronari i vetirës e parkon atë, ndërsa pas pak castesh paraqitet një person i panjohur, i cili hyn në automjet dhe e drejton atë duke ikur në drejtim të panjohur.