Rrëfimi i Rodgers për infektimin me coronavirus: Nuk mund të ecja as 10 metra

Brendan Rodgers ka bërë të ditur se kishte dalë pozitiv në testimin për coronavirus në muajin prill, duke u bërë kështu trajneri i dytë pas Mikel Artetas që konfirmon se e ka pasur sëmundjen.

Trajneri i Leicester Cityt ka rrëfyer se kishte filluar të mos ndihej mirë dy javë pas pezullimit të kampionatit anglez, ndërsa i kishte humbur ndjenjën e shijes dhe nuhatjes, si edhe kishte pasur dispne (frymëzënie) akute.

Rodgers, i cili ka treguar se edhe gruaja e tij, Charlotte, e ka pasur virusin – do të vazhdojë testimin dy herë në javë, njësoj sikurse edhe lojtarët dhe stafi i klubit – që është pjesë e projektit të rifillimit të Ligës Premier me datën 17 qershor.

“Më e çuditshmja ishte nuhatja dhe shija. E han darkën dhe nuk mund të shijosh as nuhatësh asgjë. Kjo ishte gjëja më e madhe”.

“Pastaj e humb forcën. Nuk mund të ecësh as 10 metra pa u mbushur frymë. Më është dukur njësoj si kur jam ngjitur në Mount Kilimanjaro në vitin 2011. Kur arrin në një lartësi të caktuar, ecën dhe e ke të vështirë të marrësh frymë”.

“Herën e parë kur u përpoqa të ushtroj, nuk mund të vrapoja as 10 metra. Vërtet më rrëzoi, por fatmirësisht nuk ishte aq serioz sesa te shumë njerëz të tjerë”.

"I went for a run, and I couldn't, I could hardly go 10 yards."

Leicester City manager Brendan Rodgers tells us about his coronavirus symptoms. pic.twitter.com/ozJhNxrOB2

— BBC Leicester (@BBCLeicester) May 29, 2020

“Kokëdhimbja, është ndryshe. Kokëdhimbja që kisha, ishte e izoluar në njërën anë të kokës. Mendova: ‘Nëse nuk e kam, çfarë mund të jetë kjo’, prandaj e bëmë testin”.

“Gruaja ime filloi t’i vërente efektet rreth një javë pas meje. Thjesht e dinim se duhej ta kishim. Fatmirësisht arritëm t’i bënim disa teste, 21 ditë pasi unë kisha filluar të ndihem keq. Kur i bëmë testet zbuluam se i kishim antitrupat”, ka rrëfyer 47-vjeçari për BBC. /Telegrafi/