Pas miratimit të Pakos Emergjente Fiskale, Krasniqi: Qeveria do t’i transferojë paratë në llogari të punëtorëve

Në fillim të kësaj jave, Qeveria në detyrë e Kosovës miratoi Pakon Emergjente Fiskale përmes të cilës përfshihet mbështetja financiare për bizneset gjatë periudhës së pandemisë së Coronavirusit.

Zëvendësministri i Financave dhe Transfereve, Agim Krasniqi përmes një shkrimi në Facebook ka thënë se mjetet financiare do të barten direkt në llogaritë e punëtorëve dhe jo në llogarinë e kompanisë.

“Punëtorët munden që edhe në mënyrë individuale të lajmërohen në zyret e punësimit dhe të dorëzojne kontratën e punës dhe atë të ndërprerjes si dhe llogarinë e bankës, në mënyrë që të shmangen keqpërdorimet me mjetet financiare”, ka thënë Krasniqi, përcjell Telegrafi.

Ai ka thënë se ky vendim është marrë pas miratimit të pakos, përmes së cilës do të ndahen fonde shtesë për skemat sociale dhe pensionale, mbështetje financiare për shoqëritë tregtare, huadhënie për ndërmarrjet publike në vështirësi, për komunat, shtesa për mjekë, infermierë, policë, punëtorët e dyqaneve, furrave, farmacive, e shtesa për kategori të tjera.

Vlera e pakos së miratuar nga Qeveria e Kosovës kap vlerën e 179.6 milionë eurove.

Lexo po ashtu Mjekët, infermierët, policët, zjarrfikësit dhe punëtorët e dyqaneve disa nga përfituesit e Pakos Emergjente Fiskale

Autoritetet në Kosovë kanë shpallur gjendje emergjente për shëndetin publik, me qëllim të parandalimit të përhapjes së kësaj sëmundjeje. /Telegrafi/