Abrashi reagon ndaj Kurtit për shfuqizimin e vendimit për akcizën e duhanit – vendim i ngutshëm dhe paragjykues

Qeveria e Kosovës në mbledhjen e mbajtur sot, ka shfuqizuar edhe dy vendime të Qeverisë së kaluar për ndryshimin e politikave fiskale për prodhimin e duhanit dhe heqjen e akcizës për prodhuesit vendorë të duhanit.

Ministri i Financave, Besnik Bislimi ka deklaruar se është konstatuar se ky vendim është i dëmshëm për shtetin prandaj duhet të shfuqizohet menjëherë.

Ndaj këtij vendimi ka reaguar biznesmeni, Gazmend Abrashi, këshilltar i ish-kryeministrit Ramush Haradinaj dhe nënkryetar i Aleancës për Ardhmërinë e Kosovës (AAK).

Përmes një shkrimi në Facebook, ka thënë se Qeveria e Kosovës duhet të bëjë analiza më të qëndrueshme kur vepron në politika fiskale për të mos shkaktuar dëme ekonomisë së vendit.

Lexo po ashtu Qeveria shfuqizon vendimin për politikat fiskale dhe akcizën e duhanit

“Fabrika e duhanit në Gjilan është një ndër fabrikat e pakta në Kosovë që pas privatizimit është aktivizuar për prodhim me shumë investime dhe punë. Fabrika pas 18 viteve ka filluar prodhimin, me potencial për punësimin e së paku 100 punëtorëve në prodhim. Një produkt vendor ka filluar të hyj në treg, shteti ka fituar një tatimpagues të ri, më i madhi në komunën e Gjilanit”, ka thënë Abrashi.

Sipas tij, kjo fabrikë, ka dhënë rast që të aktivizohen fermerët e kultivimit të duhanit në Anamoravë dhe Gjakovë.

Fillimi i prodhimit në Fabrikën e duhanit në Gjilan ka dhënë rast që të aktivizohen fermerët e kultivimit të duhanit në Anamoravë dhe Gjakovë që ka traditë të gjatë në këto treva. Të gjitha këto i vë në pyetje një vendim i ngutshëm i qeverisë i pa analizuar mirë dhe paragjykues.”Diçka për prodhimin vendor””, ka shkruar ai.

Ndërkaq, Qeveria Haradinaj, në tetor të vitit 2018 kishte vendosur një pikë që e rregullonte përllogaritjen e normës së akcizës për cigaret e prodhuara në Kosovë, i cili u anulua të premten nga Qeveria Kurti./Telegrafi/