Dilema në KSHZ se cilët parti opozitare shqiptare i takojnë paratë e fushatës zgjedhore

Pas zyrtarizimit të koalicionit mes LSDM-së dhe Lëvizjes Besa, hapen dilemat se cilës parti nga opozita shqiptare do t’i takojnë financat për fushatën zgjedhore. Kryetari i KSHZ-së, Oliver Derkoski ditë më parë deklaroi se pas koalicionit LSDM-Besa, paratë e fushatës i takojnë Aleancës për Shqiptarët, si parti e dytë opozitare në bllokun shqiptar. Por kjo sipas anëtarit të Lëvizjes Besa në KSHZ, Enver Salihi paraqet shkelje të Kodit Zgjedhor.

“Nuk ka nen të ligjit i cili e ndëshkon një parti nëse shkon në koalicion. Të gjitha të drejtat që i fiton një parti ato janë në bazë të zgjedhjeve të fundit parlamentare. Neni 2, pika 10 e përcakton qartë se opozita përbëhet nga partitë politike të cilat në zgjedhjet e fundit parlamentare kanë marr numër më të madh të votave. Ne do t’i interpretojmë nenet e Kodit Zgjedhor në mënyrë të drejtë dhe nuk kisha dashur t’i komentoj qëndrimet personale të kryetarit apo ndonjë anëtari”, tha Enver Salihi, anëtar i KSHZ-së.

Derkoski në mbledhjen e KSHZ-së deklaroi se përgjigjja e tij ishte hipotetike dhe se për një vendim të tillë duhet pritur propozimi i listave zyrtare për deputet.

“Të presim t’i propozojnë listat për kandidat. Është herët të flasim për një situatë të tillë. T’i presim listat pasi nuk e dimë se si do të veprojnë partitë akoma. Deri atëherë është shumë herët t’i përgjigjemi kësaj pyetje dhe të marrim qëndrim zyrtar”, tha Oliver Derkoski, kryetar i KSHZ-së.

Aleanca për Shqiptarët ka kërkuar nga KSHZ-ja t’i emëroj anëtarët dhe zëvendës-anëtarët e këtij subjekti në Këshillat Zgjedhor.

“Neve na duhet që ta kontrollojmë procesin zgjedhor përmes anëtarëve të komisioneve që do t’i kemi si ASH. Natyrisht se kemi bërë kërkesë dhe kemi struktura. Është mirë që anëtarët e komisioneve t’i takojnë asaj partie që është e organizuar nga fshati më i thellë malor ku jetojnë shqiptarë deri në çdo lagje, në çdo qytet dhe vendbanim”, deklaroi Ziadin Sela, kryetar i ASH-së.

Ekspertët rekomandojnë se për një vendim të tillë duhet prononcuar KSHZ-ja dhe duhet miratuar akt juridik me shumicë votash. Sipas tyre, në këtë situatë duhet merret parasysh edhe ankesa që subjekti i dëmtuar në këtë rast mund ta ngrit në Gjykatën Administrative. Neni 2 i Kodit Zgjedhor thotë se opozita përbëhet nga partitë politike të cilat në zgjedhjet e fundit parlamentare kanë fituar numër më të madh të votave, në këtë rast OBRM-PDUKM dhe Lëvizja Besa. Mbi këtë parim bazohen edhe dispozitat për këshillat zgjedhor dhe emetimi i programit politik nga mediat./Alsat/