Quni e Haskuka nga Prizreni u dërgojnë “selam” partive të tyre

Kryetari i degës së LDK-së në Prizren, njëherësh edhe deputeti i këtij subjekti, Anton Quni së bashku me kryetarin e Prizrenit, Mytaher Haskuka i kanë dërguar sërish mesazh subjekteve të tyre, duke treguar kështu se në këtë komunë koalicioni LVV-LDK po funksionon.

Quni përmes një postimi në Facebook, ka shkruar se “Si dy partner në qeverisje, jemi zotuar që të bëjmë gjithçka që është e mundur që qytetarëve të Prizrenit tu ofrohen shërbime më të mira e
më cilësore përgjatë vitit në të cilin sapo kemi hyrë”.

Ndërkaq kujtojmë se në nivel qendror, LVV dhe LDK ende nuk kanë arritur që të merren vesh për koalicion qeverisës.

Postimi i plotë:

Në vazhdën e përpjekjeve për ta bërë sa më të mirë dhe më të besueshme qeverisjen lokale në Prizren, sot kam takuar kryetarin e komunës, Mytaher Haskuka.

Si dy partner në qeverisje, jemi zotuar që të bëjmë gjithçka që është e mundur që qytetarëve të Prizrenit tu ofrohen shërbime më të mira e më cilësore përgjatë vitit në të cilin sapo kemi hyrë./Telegrafi/